ჯგუფი "ისინი" აქტიურად მუშაობს ახალ სიმღერებზე. ძალიან მალე ბიჭები ქართველი მსმენელის წინაშე ორი ახალი ნამუშევრით წარდგებიან, რომელთაგან, როგორც შევიტყვეთ, ერთ-ერთი თამთა გოგუაძესთან დუეტი იქნება.

რეპერტუარის განახლების პარალელურად, ჯგუფის თითოეული წევრი სხვადასხვა საქმიანობითაც არის დაკავებული. ასე მაგალითად, დიმა თეიმურაზოვი რამდენიმე დღეა, აჩი ფუცელაძის ახალი სიმღერის ფონოგრამაზე მუშაობს, რომელიც ერთ-ერთი უცხოური კომპოზიციის ქართული ინტერპრეტაცია გახლავთ.

გამომდინარე იქიდან, რომ ქართველ მომღერალ-შემსრულებლებს უცხოური სიმღერების გადმოქართულება კარგად ეხერხებათ, შეგვიძლია ვივარაუდოთ, რომ ზემოაღნიშნული მუსიკალური ნომერიც თავისი წინამორბედების ბედს გაიზიარებს და ძალზე წარმატებული იქნება.