16 წლის მშვენიერი ქართველი ჩოგბურთელი გოგონა ნანა უროტაძე სულ ერთი წელია, რაც პროფესიონალებში გადავიდა და თუმცა განსაკუთრებული წარმატებით ვერ დაიკვეხნის, ქულებს სტაბილურად აგროვებს და უკვე მსოფლიო რეიტინგის რვაასეულში შედის. თუ მის ძალიან კარგ მონაცემებს გავითვალისწინებთ, შეიძლება ითქვას, რომ ნანას წინ დიდი მომავალი აქვს და ქართული ჩოგბურთის ხვალინდელი დღე სწორედ ის არის.

- ჩოგბურთს ექვსი წლიდან ვთამაშობ, პროფესინალებში კი წელს გადავედი, - გვითხრა ნანამ, - თუმცა, პროფესიონალთა ერთ, თბილისის ტურნირი შარშანაც ვითამაშე, რომელზეც ე.წ. "უაილდ ქარდით" მოვხვდი.

- მთლიანობაში 2002 წლით კმაყოფილი ხარ.

- ვერ ვიტყვი, რომ ასეა. ნამდვილად შემეძლო უკეთ გამოვსულიყავი. ახლა გულმოდგინედ ვემზადები ორი ტურნირისათვის, რომლებიც იანვარში ინგლისში გაიმართება.

- ინგლისში წარმატებით გამოსვლას გეგმავ.

- ყველანაირად შევეცდები, თავი არ შევირცხვინო და წარმატებით ვიასპარეზო, თუმცა, მთლად სრულფასოვნად ჯერჯერობით მომზადებული არ ვარ. რამდენიმე დღე მუხლის ტრავმის გამო გამიცდა, ვარჯიში ახლახან განვაახლე და ვცდილობ, მანამდე სრულ ფორმაში შესვლა მოვასწრო.

- როგორც ცნობილია, ჩოგბურთი საკმაოდ ტრავმატული სპორტია, ამ მხრივ ბევრი პრობლემები შეგქმნია.

- საბედნიეროდ, მძიმე ტრავმებს მაინცდამაინც არ შევუწუხებივარ. ადრე ხელი მტკიოდა და ახლა ფეხის ტრავმა მივიღე. პრინციპში ეგ იყო.

- აგრეთვე ჩოგბურთი ერთობ ძვირადღირებული სპორტის სახეობაცაა. შენ სპონსორი გყავს თუ საკუთარი ძალებით ახერხებ ტურნირებზე გამგზავრებას.

- როგორც ასეთი, ოფიციალური სპონსორი არ მყავს, მაგრამ არის ხალხი, რომლებიც მეხმარება, რისთვისაც მათ დიდ მადლობას ვუხდი.

- მომავალ წელს რეიტინგში რამდენი საფეხურით ამაღლებას აპირებ.

- მინდა ოთხასეულში მაინც შევიდე. ვფიქრობ, ეს ნორმალური მიღწევა იქნება. კიდევ უფრო აღმასვლაზე მომავალში ვიფიქრებ.

- როგორ ფიქრობ, რა არის შენი ძლიერი და სუსტი მხარე.

- საერთოდ, საქართველოში სპორტსმენთა ფსიქოლოგიური მომზადება არცთუ მაღალ დონეზე დგას და ალბათ სწორედ ეს იყო ჩემი მთავარი ნაკლი მაგრამ ამჟამად ფსიქოლოგთან დავდივარ და იმედი მაქვს, რომ მის გამოსწორებას შევძლებ. ფსიქოლოგიურ მომზადებას ჩოგბურთში, როგორც სპორტის ინდივიდუალურ სახეობაში, დიდი მნიშვნელობა აქვს. რაც შეეხება ძლიერს, ალბათ ყველაზე კარგად მარჯვნიდან დარტყმა გამომდის.

- როგორც წესი, ითვლება, რომ ქართველი სპორტსმენები ფიზიკური მომზადებით ვერ დაიკვეხნიან.

- ვფიქრობ, ამის მიზეზი საერთო სიტუაცია, საჭირო პირობების არქონაა. მაგრამ, თუ შესაძლებლობა არსებობს და მოინდომებ, ყველაფერი გამოვა. მიუღწეველი არაფერია.

- შენთვის განსაკუთრებით მისაღები როგორ საფარზე თამაშია.

- ნამდვილად ჰარდზე მირჩევნია. იანვარში ინგლისში გასამართი შეჯიბრებებიც სწორებ ამ საფარზე, დახურულ კორტებზე გაიმართება.

- წელს თბილისის ქალ ჩოგბრთელთა ტურნირზე ქართველებმა არცთუ დამაჯერებლად იასპარეზეთ.

- დიახ, მე კენჭისყრამ პირველივე წრეში მაკა ჩახნაშვილს შემახვედრა. სამწუხაროდ, როგორც ჩანს, სათანადოდ ფსიქოლოგიურად მომზადებული არ აღმოვჩნდი და თამაში არ წამივიდა. წყვილთა თანრიგში კი მე და თიკა ყავლაშვილმა ფაქტობრივად ჩვენი თამაში წავაგეთ. ვფიქრობ, ამის მიზეზი გამოუცდელობა იყო, მე და თიკა ერთად იშვიათად ვთამაშობთ. საერთოდ, წყვილებში ასპარეზობა მაინცდამაინც არ მხიბლავს.

- შენი კერპი რომელი ჩოგბურთელია.

- დღემდე ჩემს კერპად მსოფლიო ქალთა ჩოგბურთის ლეგენდა შტეფი გრაფი რჩება.

- როგორც წესი, ჩოგბურთელები, მით უმეტეს, თუ შენსავით მშვენიერი გარეგნობით გამოირჩევიან, ვარსკვლავური ცხოვრებით ცხოვრობენ.

- ნამდვილად ვერ ვიტყვი, რომ ვარსკვლავური ცხოვრებით ვცხოვრობ. ყოველ შემთხვევაში ჯერჯერობით ასეა. მომავალში კი ვნახოთ, შეიძლება სარეკლამო ბიზნესში ჩემზე დიდი მოთხოვნილებაც იყოს.