2002 წელი აღსავსე იყო მსოფლიო მასშტაბის უმნიშვნელოვანესი სპორტული მოვლენებით. მარტო მსოფლიოს საფეხბურთო ჩემპიონატი რად ღირს, რომელმაც ერთი თვის განმავლობაში მთელი მსოფლიოს ყურადღება კორეა-იაპონიისაკენ მიაპყრო, სადაც ბრაზილიის ნაკრებმა ჩემპიონის ტიტული მეხუთედ მოიპოვა და მართლაც ფენომენალური შედეგი აჩვენა.

როცა მუნდიალის საუკეთესო ფეხბურთელად ოლივერ კანი დაასახელეს, ეჭვი არავის ეპარებოდა, რომ წლის ფეხბურთელის ტიტულს რონალდოს მიანიჭებდნენ. ასეც მოხდა. გარდა "ბრილიანტის ბურთისა", ბრაზილიელ "ვარსკვლავთბიჭუნას" გადაეცა "ოქროს ბურთი", "ოქროს ბუცი", "უორდ სოკერის" პრიზი... გარდა ამისა, სწორედ რონალდოს მადრიდის "რეალში" გადასვლა უნდა ჩაითვალოს წლის ტრანსფერად. იმ "რეალში", რომელმაც ჩემპიონთა თასი მერვედ მოიგო და ზედ ევროპის სუპერთასი და საკონტინენტთაშორისო თასიც მიაყოლა.

განსაკუთრებით აღსანიშნავი ჩემპიონატზე რონალდოს მიერ გატანილი 8 გოლი გახლავთ. უკვე თითქმის 20 წელია, მსოფლიო პირველობებზე ბომბარდირებს 6 გოლზე მეტი არ გაუტანიათ და ბრაზილიელის შედეგი ამ მხრივ მართლაც განსაკუთრებულია.

მიუხედავად ზემოთ თქმულისა, წლის გუნდად ალბათ მაინც იუგოსლავიის კალათბურთელთა ნაკრები უნდა მივიჩნიოთ. აშშ-ში გამართულ მსოფლიო პირველობაზე იუგებიც "პენტაკამპეონები" გახდნენ, თანაც ჩემპიონის ტიტული ზედიზედ მეორედ, ევროპის ჩემპიონატისა და ოლიმპიადის მოგების შემდეგ მოიპოვეს. ეს კი მართლაც საოცარი შედეგია.

2002 წლის სპორტსმენის ტიტული უდავოდ ალალია მიხაელ შუმახერზე. იგი ფორმულა 1-ის ჩემპიონი მეხუთედ გახდა და ლეგენდარული არგენტინელის ხუან მანუელ ფანხიოს რეკორდი გაიმეორა. თუ "შუმის" ასაკს და იმ ფაქტს გავითვალისწინებთ, რომ დღეისათვის ბადალი არ ჰყავს, მისგან კიდევ დიდ მიღწევებს უნდა ველოდოთ.

წლის მიწურულს მსოფლიო საჩოგბურთო ელიტას რუსეთის ნაკრები შეუერთდა, რომელმაც დევისის თასი მოიგო. რუსები, როგორც ბორის ელცინმა ბრძანა, ამ დღეს 90 წელი ელოდნენ.

გარდა ამისა, აღნიშვნის ღირსია 37 წლის ვეტერანის, ერთ დროს მსოფლიოს პირველი ჩოგნის პიტ სამპრასის მიერ აშშ-ს ღია პირველობის მოგება და ქალთა ჩოგბურთში დები უილიამსების გაბატონება.

რაც შეეხება მსოფლიო კრივს, აუცილებლად უნდა აღინიშნოს ლენოქს ლუისის მიერ მსოფლიოს აბსოლუტური ჩემპიონის ტიტულის მოგება და ოსკარ დე ლა ჰოიასა და ვიტალი კლიჩკოს წარმატებები. ეს უკანასკნელი ხომ სულ მალე ტიტულს ლუისს შეეცილება.