ეს ამბავი ნიკიტა ხრუშჩოვის ცკ-ს მდივნობის დროს მოსკოვში მოხდა. ჩავიდნენ მივლინებით თბილისის ერთ-ერთი სამეცნიერო-კვლევითი ინსტიტუტის თანამშრომლები. გამოფენაზე უნდა ეჩვენებინათ ახალი კონსტრუქციის ხელოვნური დაწვიმების აპარატი. გამოფენის ტერიტორიაზე იყო დიდი წყლის აუზი. შუაგულში უნდა დაემაგრებინათ ეს აპარატი და ჩაერთოთ, რომ დემონსტირება გაეკეთებინათ, რა თქმა უნდა, ხრუშჩოვის საჩვენებლად.

დარეკეს კრემლიდან, რომ 10-15 წუთში ხრუშჩოვი თავის თანმხლებ პირებთან ერთად მოვიდოდა სანახავად. საჭირო იყო აპარატის დაყენება.

შემოდგომის ცივი ამინდი იყო, საჭირო შეიქმნა რაღაც ხიდის საშუალებით აპარატის მიტანა შუაგულში და დამაგრება. ეს ითავა ერთ-ერთმა ახალგაზრდამ, საკმაოდ ცნობილმა ინჟინერმა (გვარს არ ვასახელებ შეგნებულად, ვინაიდან მას და მის ოჯახს მთელი რესპუბლიკა იცნობს).

მოკლედ, მოვიდა როგორღაც აპარატით და დაყენების დროს ჩაუვარდა წყალში სიჩქარით. თქვენ წარმოიდგინეთ, რა ამბავი დატრიალდა. ინსტიტუტის დირექტორიც იქ იმყოფებოდა, ფიქრის დრო აღარ რჩებოდა. ეს ახალგაზრდა გაშიშვლდა და გადახტა გაყინულ წყალში. გამოფენის დირექტორი მაშინ ერთი ლამაზი და წარმოსადეგი ქალი იყო, ისიც იქ იმყოფებოდა და ნერვიულობდა. მოკლედ, დაყვინთა, ამოიტანა აპარატი ადგილზე დააყენა და დიდი ტაშიც დაიმსახურა.

მერე ინსტიტუტის დირექტორმა უთხრა, რახან გადამარჩინე და გამომიყვანე ამ მდგომარეობიდან, მთხოვე რაც გინდა და შეგისრულებო. ახალგაზრდამ კბილების კანკალით მიუგო, არაფერი არ მინდა, ოღონდ ამ ღამით იმ ლამაზ ქალთან (გამოფენის დირექტორზე ანიშნა) ჩამიწყვე საქმეო. რა თქმა უნდა, ამან დიდი სიცილ-ხარხარი გამოიწვია.

გ. ჯიხაიშელი