2010-06-30

ნანა სრული სვლით

გუშინ მოჭადრაკე ქალთა ფიდეს გრან-პრის გათამაშებაზე ჯერმუკში სხვა ტურებისგან განსხვავებული დღე იყო, აგრესიულობით გამორჩეული. ცხადია, 64-უჯრიან დაფებზე ორთაბრძოლებს ვგულისხმობთ. დასტურად ისიც გამოდგება, რომ ექვსივე შეხვედრა შედეგიანად დასრულდა - თეთრებმა ყველა პარტია მოიგეს. ასეთი რამ კი იშვიათად ხდება, თანაც ისეთ ტურნირებში, რომლებშიც პლანეტის უძლიერესი დიდოსტატები მონაწილეობენ.
გულშემატკივართა ყურადღება განსაკუთრებით იმ დაფისკენ იყო მიპყრობილი, რომელზეც გრან-პრის მეოთხე გათამაშების უმთავრესი ფავორიტები _ ნანა ძაგნიძე და რუსი ტატიანა კოსინცევა ხვდებოდნენ ერთმანეთს. შეგახსენებთ, რომ წინა სამი ტურნირიდან ძაგნიძემ ორში ითამაშა (ნანძინი, ნალჩიკი) და 230 ქულას მოუყარა თავი. კოსინცევამ კი მხოლოდ ნალჩიკში მოსინჯა ძალები და პირველი ადგილის დაკავებით 160 ქულა დაიმსახურა.
ჯერმუკში მათი გზები მე-6 ტურში გადაიკვეთა. თეთრებით ჩვენებური თამაშობდა. ერთგვარ პოზიციურ უპირატესობას ნანამ დებიუტშივე მიაღწია, რაც მიტელშპილში კიდევ უფრო განამტკიცა პაიკის მოგებით. 41-ე სვლისთვის კოსინცევას პარტია, ფაქტობრივად, წაგებული ჰქონდა. ძაგნიძის დ6 სვლას შავებმა მბ6-ით უპასუხეს, რითაც ფ2 უჯრიდან თეთრების კუს გატყუება და თავიანთი ეტლისთვის ე1 უჯრის გათავისუფლება სურდათ. ისეთი შთაბეჭდილება შეიქმნა, წყალწაღებული ხავსს ეკიდებაო, რადგან შავების ეე1 სვლის შემდეგ ძაგნიძემ მეტოქეს დაუფიქრებლად შესწირა ლაზიერი და რამდენიმე სვლაში ზედმეტი ფიგურით დარჩა. რუსი მოჭადრაკე იძულებული გახდა, მარცხს შეგუებოდა.
სამწუხაროდ, ისევ დაუცდა ფეხი მაია ჩიბურდანიძეს, არადა, ქართველ დიდოსტატს სომეხ ლილით მკრტიჩიანთან შავებით თამაშისას 30-ე სვლისთვის მოსაგები პოზიცია ჰქონდა. მომდევნო ექვს სვლაში უხეშად შეცდა და მოწინააღმდეგეს გამარჯვება მიულოცა.
დანარჩენი პარტიები ასე დამთავრდა: შენ იანი (ჩინეთი)-მარტა ფიერო (ეკვადორი) 1:0, სიუ იუჰუა (ჩინეთი)-ბაირა კოვანოვა (რუსეთი) 1:0, ჰოუ იფანი (ჩინეთი)-პია კრამლინგი (შვედეთი) 1:0, ანტუანეტა სტეფანოვა (ბულგარეთი)-ელინა დანიელიანი (სომხეთი) 1:0.
ექვსი ტურის შემდეგ: ძაგნიძე _ 5,5, მკრტიჩიანი _ 4,5, კოსინცევა _ 4, ჰოუ იფანი, შენ იანი _ 3,5-3,5, დანიელიანი, სტეფანოვა, სიუ იუჰუა _ 3-3, ჩიბურდანიძე _ 2,5, კრამლინგი _ 2, კოვანოვა _ 1,5, ფიერო _ 0 ქულა.
მოასპარეზენი დღეს დაისვენებენ. ხვალ მე-7 ტურში ითამაშებენ: დანიელიანი-მკრტიჩიანი, კრამლინგი-სტეფანოვა, კოვანოვა-ჰოუ იფანი, ფიერო-სიუ იუჰუა, კოსინცევა-შენ იანი, ჩიბურდანიძე-ძაგნიძე.

ავტორი:  ვაჟა დანელია

აპრილი  2010

ორშ   

სამ   

ოთხ   

ხუთ   

პარ   

შაბ   

კვ