2010-06-30

გამარჯვებულები და დამარცხებულები

ივნისის ტესტები დამთავრდა. ჩრდილოელებმა სამხრეთი ნახევარსფერო დატოვეს და შინ დაბრუნდნენ. ახლა მათ ერთთვიანი შვებულება ექნებათ, დაისვენებენ, სულს მოითქვამენ. მერე ისევ ყოველდღიური რუტინა, შრომა, ჯაფა და მომავალი მსოფლიო თასისთვის მზადება დაიწყება. ეს ჩრდილოელები, სამხრეთელებს კი ერთ კვირაში სამი ერის გათამაშების ბატალიები ეწყებათ და ვნახოთ, რომელმა მათგანმა გამოიყენა უკეთ მოსამზადებლად ივნისის ტესტები.
გამარჯვებულები

1. ფელიპე კონტეპომი
არგენტინის ნაკრების მგეზავმა შოტლანდიელებთან დაპირისპირებისგან განსხვავებით საფრანგეთის ნაკრებთან ვირტუოზულად ითამაშა. კონტეპომი ფრანგ მორაგბეებს კარგად იცნობს და მათთან თამაში ოდნავაც არ გასჭირვებია. მას შემდეგ, რაც ფელიპემ ერთი წლის წინ ტრავმა მიიღო, ის არგენტინის ნაკრების ჭეშმარიტ ლიდერად პირველად წარმოჩნდა. მივესალმოთ მაესტროს დაბრუნებას.

2. ტენდაი მთავარირა
დაბადებით ზიმბაბველი, თუმც თხემით ტერფამდე სამხრეთაფრიკელი ტენდაი მთავარირას ეპოპეა მისი გამარჯვებით დასრულდა. სირცხვილი პოლიტიკოსებს. მათ ტენდაის "ბოკეს" შემადგენლობაში თამაში აუკრძალეს. ეს მთავარირასთვის უდიდესი ფსიქოლოგიური დარტყმა იყო. ახლა ყველაფერი მოგვარდა. "სპრინბოკის" შერკინების ბურჯს სამხრეთ აფრიკის მოქალაქეობა მიანიჭეს და ის ისევ საქმეშია. "ბოკე" მთავარირათი ბევრად უფრო სახიფათოა. "ოლ ბლექსო" და "ვოლაბებო" ძრწოდეთ.

3. სამოას კუნძულები
სამოელებმა წლეულს შვიდკაცა რაგბის მსოფლიო სერია მოიგეს. ამჯერად კი, სტარტზე განცდილი წარუმატებლობისა და თავს დამტყდარი კრიტიკის ქარიშხლის მიუხედავად, წყნარი ოკეანის აუზის ქვეყნების გათამაშებაში პირველი ადგილი დაიკავეს. ვფიქრობთ, 2011 წლის მსოფლიო თასის ჯგუფურ ეტაპზე სამხრეთ აფრიკის, ფიჯისა და უელსის ნაკრებებთან ბოლომდე მებრძოლ სამოას ვიხილავთ.

4. ავსტრალიის შერკინება
ივნისის ტესტების ბოლო მატჩში ირლანდიასთან, წინა მატჩებთან შედარებით, ბევრად უკეთ გამოიყურებოდა. ყოველ შემთხვევაში, ჩანს, რომ "ვოლაბების" შერკინება ნელ-ნელა პროგრესირებს.
5. ხოსე გეარი
გასული კვირის შუაში მაორებმა ინგლისის ნაკრებთან ეპიკური გამარჯვება მოიპოვეს. მატჩში ორივე გუნდიდან ყველაზე გამორჩეული იყო ხოსე გეარი, რომელმაც მეტოქეს სამი ლელო გაუტანა. ხოსემ უმაღლესი რანგის თამაში გვიჩვენა.


დამარცხებულები

1. საფრანგეთის ნაკრები
საფრანგეთის ნაკრების ყველა მოთამაშე აუცილებლად უნდა დაასვენონ, მათ კარგად უნდა გამოიძინონ და ძალები აღიდგინონ. რაც ყველაზე მთავარია, სწრაფად უნდა დაივიწყონ ივნისის ტესტების საშინელებანი. ორი ტესტმატჩი და ორივეში კატასტროფული მარცხი. აქამდე საფრანგეთის ნაკრებს მსგავსი არ დამართია. გუნდი ერთიანად გამოფიტული, ძალაგამოცლილი გამოიყურებოდა. ფრანგები მოედანზე ძლივს დალასლასებდნენ. თუმცა ეს ყოველივე მარკ ლივერმონისა და მისი ბიჭებისთვის შესანიშნავი გაკვეთილი შეიძლება გამოდგეს.

2. ისტ ლონდონი
სამხრეთ აფრიკის ეს ზღვისპირა ქალაქი რაგბის თამაშისთვის შესაფერის, ღირსეულ ალაგად მიიჩნეოდა. თუმცა ვუვუზელას ჭყვიტინმა ისევ ყველაფერი გააფუჭა. არსაიდან ისმოდა ქომაგთა შეძახილები, არც შერკინებაში შესული მორაგბეების გმინვა. ისმოდა ვუვუზელა, რომლის თანხლებითაც მირკო ბერგამასკო წარმატებით ურტყამდა საჯარიმოებს. სირცხვილი ისტლონდონელებს.

3. ქუადე კუპერი
ის უდავოდ უნიჭიერესი მორაგბეა, მაგრამ საერთაშორისო მატჩებში ასპარეზობის გამოცდილების ნაკლებობის გამო არასტაბილურად ირჯება. იოლ მეტოქესთან დაფრინავს, ხოლო როცა სერიოზულ წინააღმდეგობას აწყდება, როგორც ჩანს, განსწავლულობა არ ჰყოფნის ან, შესაძლოა, ფსიქოლოგიურად არ არის ჯერ მზად, ბობოლებს ერკინოს.

4. ხოსე გეარი
საოცარია, მაგრამ გრემ ჰენრიმ ის სამი ერის გათამაშებაში საასპარეზოდ ახალი ზელანდიის ნაკრების შემადგენლობაში არ გამოიძახა. არადა, ხოსე ბრწყინვალე ფორმაშია. "ოლ ბლექსის" ყოფილ გარემარბს კეთილი ნების თამაშებზე ახალი ზელანდიის შვიდკაცა რაგბის ნაკრებში მოუწევს გამოსვლა. ეს მისთვის კიდევ ერთი გამოცდა იქნება. იმედი გვაქვს, გეარი თავს აქაც გამოიჩენს და, ბოლოს და ბოლოს, ეროვნულ ნაკრებშიც ათამაშებენ.

5. ინგლისის ნაკრები
მაორებთან და ავსტრალიის ნაკრებთან მარცხი არაფერია იმ წაგებასთან, რაც ამ ქვეყნის ფეხბურთელთა ნაკრებმა მსოფლიოს ჩემპიონატზე განიცადა გერმანიის ეროვნულ გუნდთან. ამ მატჩმა დიდი მითქმა-მოთქმა, დავა-კამათი გამოიწვია. მსჯელობენ, რა ტექნოლოგიები დანერგონ, რათა არბიტრების მსგავსი შეცდომები თამაშის შედეგზე გავლენას არ ახდენდეს.
რაა სადავო? რატომ უნდა გამოიგონონ ველოსიპედი, როცა ის უკვე გამოგონილია. არსებობს ბრწყინვალედ აპრობირებული მეთოდი - ვიდეორეფერი! მანამდე კი ინგლისის რაგბისა და ფეხბურთის ნაკრებები შინ ერთად ბრუნდებიან.

ავტორი:  მოამზადა ბესიკ ჯანგავაძემ

აპრილი  2010

ორშ   

სამ   

ოთხ   

ხუთ   

პარ   

შაბ   

კვ