თბილისში გასაყიდი ტერიტორია თითქმის აღარ დარჩა. სადაც კი სავაჭრო ცენტრისა თუ კვების ობიექტის გახსნა შეიძლებოდა, მერიამ გასასხვისებელი არ დატოვა. ბიზნესმენებმა ტროტუარები და კორპუსებს შორის ადგილებიც კი შეისყიდეს. ეს კი მოსახლეობის დიდ უკმაყოფილებას იწვევს და ხშირად საქმე შეტაკებამდეც კი მიდის. თუმცა, საპროტესტო აქციები და მერია-გამგეობებისთვის დახმარების თხოვნა უშედეგოდ მთავრდება. მოსახლეობასა და ბიზნესმენებს შორის ატეხილი დავა, როგორც წესი, ამ უკანასკნელთა სასარგებლოდ სრულდება. სანამ მოსახლეობა რამეს გაიგებდეს, ბიზნესმენს ადგილიც ნაყიდი აქვს და პროექტიც - არქიტექტურის დეპარტამენტთან შეთანხმებული.

ასეთი მდგომარეობის ფონზე ვაჟა-ფშაველას გამზირის მცხოვრებთა გამარჯვება ნამდვილად უპრეცენდენტო შემთხვევად უნდა ჩაითვალოს. ყოფილი მოჭადრაკე თამაზ გიორგაძე ახლახან ამ ქუჩაზე, სასტუმრო "აფხაზეთის" პირდაპირ, კორპუსებს შორის, სავაჭრო ცენტრის აშენებას აპირებდა, მაგრამ მოსახლეობამ არ დაანება. აქ რომ სავაჭრო ცენტრი აშენდეს, "კუდის მოსაბრუნებელი" ადგილი აღარ დაგვრჩება. საცხოვრებელ კორპუსებთან ასე ახლოს არაფრის აშენება არ შეიძლებაო, ჩიოდნენ მოქალაქეები. მათ ჯერ ვაკე-საბურთალოს რაიონის სასამართლოს მიმართეს და არაფერი რომ არ გამოუვიდათ, ქუჩა გადაკეტეს. საპროტესტო აქციის შემდეგ, ვაკე-საბურთალოს რაიონის გამგეობამ, მოსახლეობის გასაკვირად, მათი მოთხოვნა დააკმაყოფილა და სავაჭრო ობიექტის მშენებლობა შეაჩერა. სავაჭრო ცენტრის მეპატრონემ გამგეობის გადაწყვეტილება გააპროტესტა, რადგან მას მერიიდან ყველა საჭირო ნებართვა აქვს, მაგრამ ვაკე-საბურთალოს რაიონის არქიტექტორებმა მერიის არქიტექტურის დეპარტამენტის მიერ დამტკიცებულ პროექტში გარკვეული ხარვეზები აღმოაჩინეს. "პროექტში გაბარიტული ზომებია დარღვეული, არქიტექტურულ ნორმებში არ ჯდება. გამგეობამ მშენებლობა ამიტომაც შეაჩერა," - გვითხრა რაიონის მთავარმა არქიტექტორმა თამაზ მურვანიძემ.

საქმეს კვლავ ვაკე-საბურთალოს რაიონის სასამართლო იძიებს. თუმცა, ამჯერად, როგორც გამგეობის მთავარი არქიტექტორი ვარაუდობს, სასამართლო უფრო ობიექტური იქნება და სავაჭრო ცენტრის მშენებლობას მანამ შეაჩერებს, სანამ თამაზ გიორგაძე პროექტში დაშვებულ ხარვეზებს არ გაასწორებს. ასე რომ, მოსახლეობამ, ჯერჯერობით, გაიმარჯვა. მომავალში გამორიცხული არაფერია.