საქართველოსა და რუსეთს შორის მიმდინარეობს მოლაპარაკება რუსეთის ფედერაციის ბაზარზე ქართული ღვინოებისა და მინერალური წყლების დაბრუნების შესახებ. თუმცა, დღესაც, მაგალითად, მოსკოველებისთვის არ არის პრობლემა შეუკვეთონ ინტერნეტ მაღაზიაში ერთი ბოთლი "ქინძმარაული" ან იყიდონ "ბორჯომი" უახლოეს სავაჭრო ცენტრში. როგორ ხვდება აკრძალული საქონელი რუსეთის ფედერაციაში. ბელარუსის მეშვეობით.
ამის შესახებ ტელეარხ "მირთან" ინტერვიუში ისაუბრა რუსეთის ფედერაციის მთავარმა სანიტარიულმა ექიმმა გენადი ონიშჩენკომ.
ჩინოვნიკის სიტყვებით, "ყველაზე მეტად ხულიგნობს, ჩვენ ამას ასე ვუწოდებთ, ბელარუსი. როდესაც შემოაქვთ თავიანთ ტერიტორიაზე, ისინი ახდენენ რუსეთში რეტრანსლაციას არა მხოლოდ მინერალური წყლისა, არამედ ღვინისაც... ჩვენ ჯერჯერობით ამას ვითმენთ. მაგრამ მთელი პერიოდი, სანამ მოქმედებდა აკრძალვა, მოსკოვში დრაგომიროვის ბაზარზე იყიდებოდა ყოველივე ეს, ჩვენ ამის შესახებ ვიცოდით".
ონიშჩენკომ სიტუაციას "წვრილმანი ფუსფუსი" უწოდა, რომელთანაც მას არანაირი ურთიერთობა არ გააჩნია. "აი, შეიძლება გაყიდო ერთი ყუთი, ათი, - თქვა მან. - მერე რა. განა ეს ეკონომიკური ურთიერთობაა."
შეგახსენებთ, რომ 2006 წლის გაზაფხულზე რუსეთში გაჩაღდა ეგრეთ წოდებული "ღვინის სკანდალი". გაყიდვიდან ამოიღეს მილიონობით ლიტრი ღვინო საქართველოდან და მოლდოვიდან, რისი საბაბიც გახდა რუსეთის ფედერაციის მთავარი სანიტარიული ექიმის გენადი ონიშჩენკოს განცხადება იმის შესახებ, რომ ღვინო არ შეესაბამება სტანდარტებს პესტიციდების, ტოქსინებისა და კონსერვანტების შემცველობით. 2006 წლის 27 მარტს რუსეთის სამომხმარებლო ზედამხედველობის მითითებით მთლიანად აიკრძალა რუსეთში ღვინისა და ღვინომასალების შემოტანა და გაყიდვა საქართველოდან და მოლდოვადან.
სკანდალს აშკარა პოლიტიკური სარჩული ჰქონდა. საქართველოს სოფლის მეურნეობის სამინისტრომ განაცხადა, რომ ზარალი ამ გადაწყვეტილებასთან დაკავშირებით ათობით მილიონ დოლარს შეადგენს. ბოთლებში ჩამოსხმულ ქართულ ღვინოს ეკავა რუსეთის ბაზრის დაახლოებით 10 პროცენტი. რუსეთში იგზავნებოდა საქართველოს მიერ ექსპორტირებული ღვინის დაახლოებით 80 პროცენტი. იმავე წლის 4 მაისს ონიშჩენკომ სრულად აკრძალა რუსეთის ტერიტორიაზე მინერალური წყლის "ბორჯომის" შემოტანა და გაყიდვა. "ბორჯომის" ექსპორტის 35 პროცენტი რუსეთზე მოდიოდა.
2012 წლის 1 ოქტომბერს პარლამენტის არჩევნებზე მილიარდერ ბიძინა ივანიშვილის კოალიციის "ქართული ოცნების" გამარჯვებით მნიშვნელოვნად დათბა რუსეთ-საქართველოს ურთიერთობანიც. მიმდინარე წლის თებერვლის ბოლოს საქართველოში ჩავიდა რუსეთის სამომხმარებლო ზედამხედველობის ექვსი სპეციალისტი მიზნით - შეესწავლათ საკითხი ადგილობრივი ღვინისა და მინერალური წყლების რუსეთის ბაზარზე დაბრუნების შესაძლებლობის შესახებ.
აღსანიშნავია, რომ 2012 წლის შედეგებთან დაკავშირებულ პრესკონფერენციაზე ბელარუსის სახელმწიფო საბაჟო კომიტეტის საბაჟო კონტროლის ორგანიზაციის სამმართველოს უფროსმა ვლადიმირ ორლოვსკიმ განაცხადა, რომ უკანასკნელ წლებში პრობლემა ალკოჰოლის კონტრაბანდასთან დაკავშირებით ბელარუსის საზღვრის გავლით მწვავედ არ დგას. ჩინოვნიკის სიტყვებით, პრობლემები უკვე პრაქტიკულად არ არის დაახლოებით ოთხი წელიწადია.
ყველაფერი იმის გამო, რომ ონიშჩენკო ჯერჯერობით ამას ითმენს.


ნოვოსტი