ოდესღაც ჯინა ლოლობრიჯიდას მსოფლიოს ულამაზეს ქალად ასახელებდნენ. ახლა იგი 85 წლისაა და ამ ასაკში მატრიმონიალური სკანდალის ცენტრში აღმოჩნდა.
საქმე ისაა, რომ ბოლო დრომდე მას საყვარელი, მასზე 34 წლით ახალგაზრდა ესპანელი ბიზნესმენი, ვინმე ხავიერ რიგაუ-ი-რაფოლსი ჰყავდა, რომელმაც მსახიობთან... ქორწინების ინსცენირება მოაწყო, მის ადგილზე რეგისტრაციაზე ვიღაც სხვა ქალი მიიყვანა, რომელიც ძალიან ჰყავს ჯინას და ახლა ქონებას ედავება!
ლოლობრიჯიდამ და რიგაუ-ი-რაფოლსმა ერთმანეთი მონტე-კარლოში ჯერ კიდევ 80-იან წლებში გაიცნეს. ჯინა აცხადებს, რომ ბოიფრენდს მასთან ხელმოსაწერად რაღაც იურიდიული საბუთები მოჰქონდა ესპანურ ენაზე, რომლებსაც იგი ხელს აწერდა, თუმცა კი ენა არ იცის, მაგრამ სატრფოს ენდობოდა.
ინგლისური გამოცემის "დეილი ტელეგრაფის" ცნობით, ლოლობრიჯიდა სერიოზულად ფიქრობდა ხავიერზე გათხოვებას. "მეგონა, რომ დეპრესიიდან გამოვიდოდი, თუკი ცხოვრების წესს მკვეთრად შევცვლიდი. მაგრამ ნიუ-იორკიდან ქორწილისთვის რომ ჩამოვედი, მივხვდი, რომ შეცდომას ვუშვებდი", - ამბობს მსახიობი.
ჰოდა, სულ ახლახან, ისიც შემთხვევით, ჯინამ გაიგო, რომ 2010 წლიდან იგი, თურმე, გათხოვილი ყოფილა - ინტერნეტში მან დოკუმენტი ნახა, რომლის თანახმად ხავიერ რიგაუ-ი-რაფოლსი მისი ქმარია და რომ მათი ქორწინება ბარსელონაში, რვა მოწმის თანდასწრებით მომხდარა - არადა, ტაძარში სხვა ქალი, სახელად ტერეზა იყო, რომელიც ძალიან ჰგავს ჯინას. ახლა იგი ძალიან, ძალიან გაბრაზებულია და სასამართლოში ჩივილს აპირებს, - განაცხადა ვილიმ, მსახიობის მსახურმა.