2009-04-16

სასამართლომ ვალის გადახდა გარდაცვლილის დედას დააკისრა

გურჯაანის რაიონის სოფელ მელაანში მცხოვრები ზინა ირომაშვილი რაიონული სასამართლოს გადაწყვეტილებას აპროტესტებს. მოსამართლემ ზინა ირომაშვილს მისი გარდაცვლილი შვილის მიერ აღებული ვალის გადახდა დააკისრა და იმის გამო, რომ ირომაშვილი სოციალურად დაუცველია და პენსიის გარდა სხვა შემოსავალი არ აქვს, მას თანხას კუთვნილი პენსიიდან უკავებენ. ამ ინფორმაციას არასამთავრობო ორგანიზაცია ადამიანის უფლებათა ცენტრი ავრცელებს. როგორც ზინა ირომაშვილმა ადამიანის უფლებათა ცენტრს განუცხადა, 2002 წელს, მისმა შვილმა ვანო კარაპეტოვმა მეზობლად მცხოვრებ ბეჟუაშვილებს ერთი ძროხა იმ პირობით გამოართვა, რომ ვლადიკავკაზში წავიდოდა და ფულს იქიდან გამოუგზავნიდა, მაგრამ მოგვიანებით ცნობილი გახდა, რომ კარაპეტოვი ვლადიკავკაზში გარდაიცვალა. ბეჟუაშვილებმა თანხის მიღების მოთხოვნით გურჯაანის რაიონულ სასამართლოს მიმართეს. მოსამართლემ დააკმაყოფილა მათი სასარჩელო მოთხოვნა და თანხის გადახდა გარდაცვლილის დედას ზინა ირომაშვილს დააკისრა.

საქართველოს უზენაესი სასამართლოს ინფორმაციით, საქმეში არსებობს მტკიცებულებები და მოწმეთა ჩვენებები, რომლითაც დასტურდება, რომ ვაკო კარაპეტოვს ბეჟუაშვილების ვალი ნამდვილად ჰქონდა 370 ლარის ოდენობით და ვალის აღების დროს შვილს თავდებად დედა, ზინა ირომაშვილი დაუდგა. თავად ზინა ირომაშვილი თავდებობის ფაქტს კატეგორიულად უარყოფს.

აპრილი  2009

ორშ   

სამ   

ოთხ   

ხუთ   

პარ   

შაბ   

კვ