OPENTEXT.ORG.GE

საქართველოს რესპუბლიკა

2015-01-31

ყოვლადწმინდა ღვთისმშობლის ხატის "მანუგეშებელი" დღესასწაული

1 თებერვალს საქართველოს მართლმადიდებელი სამოციქულო ეკლესია დღესასწაულობს ღვთისმშობლის ხატის "მანუგეშებელი" ხსენებას, რომელსაც "ვათოპედის" ხატსაც უწოდებენ.
მარიამ ღვთისმშობლის ხატი "მანუგეშებელი" ათონის მთაზე, ვათოპედის ხარების ეკლესიაში იმყოფება. ამ უძველესი ხატის შექმნის ისტორია ასეთია: კონსტანტინე დიდის მეფობის დროს ხარების ეკლესია აიგო.
ნიშანდობლივია, რომ სწორედ ამ მონასტრის სიახლოვეს, 395 წელს უფლისწული არკადი გემბანიდან გადავარდა და დიდი ძებნის შემდეგ მონასტრის ახლოს, ბუჩქის ძირას იპოვეს.
ბერძნული სიტყვა "ვათოპედი" ნიშნავს ყმაწვილის ბუჩქს, ყმაწვილმა - უფლისწულმა ყველას უამბო, თუ როგორ იხსნა იგი ყოვლადწმინდა ღვთისმშობელმა სასწაულებრივად.
აღსანიშნავია, რომ ტაძრის საკურთხევლის ნაწილი სწორედ იმ ბუჩქის ადგილასაა აღმართული.
ამბობენ, რომ მონასტერზე ყაჩაღთა ბანდას თავდასხმა ჰქონდა განზრახული, თურმე, მაშინ წინამძღვარს "მანუგეშებელი" ხატიდან ხმა მოესმა, რომელმაც მონასტრის კარიბჭის გაღება აუკრძალა. იმ წუთში ხატი სასწაულებრივად შეიცვალა, თითქოს გაცოცხლდა, ყრმამ ყოვლადწმინდა ღვთისმშობელს ბაგაზე ხელი ააფარა, მაგრამ ქალწულმა მარიამმა პირი იბრუნა და გაფრთხილება გაიმეორა. შეძრწუნებულმა იღუმენმა ძმებს მოუხმო და ყველამ იხილა, ღვთისმშობლის გამოსახულება, ყრმა უფლის ხელს არიდებდა სახეს.
ღვთისმშობლის ხატი "მანუგეშებელი" ანუ "ვათოპედი" ავადმყოფთა შემწედ ითვლება.