OPENTEXT.ORG.GE

საქართველოს რესპუბლიკა

2015-01-31

ბელარუსში მოემზადებიან

საქართველოს 17-წლამდელ ხელბურთელ გოგონათა ნაკრები (თინათინ ყაველაშვილი, თამარ ჩაჩუა ("პეგასი"), მედეა ჩოხელი ("პეგასი"), თამთა თეთრაშვილი ("ყვარელი"), ქრისტინე ღვალაძე, თამარ გიორგაძე ("მამული"), თამარ ჩოგოვაძე ("პეგასი"), მარიამ მიხელიძე ("ყვარელი"), ანა ყველაშვილი, ნინო გაბისონია ("მამული"), თინათინ ქიტესაშვილი, ქეთი კუნელაშვილი ("ყვარელი"), მაია ბერიძე ("პეგასი"), მთავარი მწვრთნელი როლანდ ერაძე, მწვრთნელი გიორგი გვაზავა, ექიმი ანა ხუბულური, მენეჯერი ინა ჭკუასელი, დელეგაციის ხელმძღვანელი დიმიტრი აბესაძე) ბელარუსში გაემგზავრა, სადაც 3 თებერვლამდე დარჩება და ხუთ ამხანაგურ შეხვედრასაც გამართავს. ბელარუსული ტურნეს მთავარი მიზანია ორი მნიშვნელოვანი შეჯიბრებისთვის მომზადება: 20-22 მარტს ჩვენი გოგონები ქუთაისში თანატოლთა შორის ევროპის ჩემპიონატის საკვალიფიკაციო ტურნირის ოთხგუნდიან ჯგუფში (ნორვეგია, ჰოლანდია, ლიტვა, საქართველო) იბრძოლებენ ფინალური ეტაპის ორი საგზურისთვის, ხოლო თბილისში (26 ივლისი-1 აგვისტო) ევროპის ახალგაზრდობის ოლიმპიურ ფესტივალში დაიცავენ ქვეყნის ღირსებას. ამ შეჯიბრებებისთვის შერჩეულმა შვიდივე უძლიერესმა ევროპულმა ნაკრებმა თბილისში ჩამოსვლის სურვილი დაადასტურა. საქართველოს დედაქალაქში ფესტივალის მედლებისთვის იბრძოლებენ: რუსეთი, დანია, ნორვეგია, ჩეხეთი, რუმინეთი, გერმანია, ჩერნოგორია და საქართველო.
ჭაბუკთა მსგავს ტურნირზე მოწვეულთაგან ჯერჯერობით მხოლოდ ესპანეთს არ მოუწერია თანხმობა. პირენეელები თუ უარს იტყვიან, მათ სარეზერვო შვეიცარიის ნაკრები შეცვლის. ჭაბუკთა ტურნირის შემადგენლობა ასეთი იქნება: საფრანგეთი, უნგრეთი, ესპანეთი (შვეიცარია) დანია, სლოვენია, ნორვეგია, შვედეთი და საქართველო. ორივე ტურნირის წილისყრა 24 აპრილს თბილისში გაიმართება.
ბელარუსიდან დაბრუნების შემდეგ გოგონები საკუთარ კლუბებს დაუბრუნდებიან და თებერვალში 1998-1999 წლებში დაბადებულებს შორის საქართველოს ჩემპიონატის პირველ ტურს გამართავენ. 1-6 მარტს ნაკრები პოლონეთს მიაშურებს საკონტროლო თამაშების ჩასატარებლად, მაისში უკრაინული ტურნე ექნებათ, ხოლო 15-21 ივნისს თბილისში საერთაშორისო ტურნირზე - ჯემალ ცერცვაძის თასის გათამაშებაში იასპარეზებენ.