"ხელისუფლებას არ სურს ხალხთან საუბარი", - ამ დასკვნამდე ენერგეტიკოსთა საზოგადოების ლიდერი მირონ ფირცხელანი მას შემდეგ მივიდა, რაც დღეს სახელმწიფო მინისტრის მოადგილეს მამუკა ნიკოლეიშვილს შეხვდა. ფირცხელანი დღეს სახელმწიფო კანცელარიის წინ გამართულ საპროტესტო აქციას ხელმძღვანელობდა.

აქციის მონაწილეთა სამკაციანი ჯგუფი ნიკოლეიშვილისგან ითხოვდა, რომ ხელისუფლებამ ხელი აიღო სტრატეგიული ენერგოობიექტების გასხვისებაზე, ტარიფები შემცირდეს, ხოლო ენერგეტიკოსებმა 13 თვის სახელფასო დავალიანება მიიღონ, თუმცა ამისი პირობა ჯგუფმა ვერ მიიღო.

სახელმწიფო მინისტრის მოადგილე შეეცადა მათ დარწმუნებას იმაში, რომ ქვეყანას სხვა გამოსავალი არა აქვს, თუ არა ობიექტების გასხვისება და თუ ენერგეტიკოსებს ეს გაუმართლებლად მიაჩნიათ, შეუძლიათ შეიმუშაონ ენერგეტიკული განვითარების ალტერნატიული კონცეფცია და წარუდგინონ მთავრობას, აქციას არავითარი შედეგი არ მოჰყოლია. როგორც ფირცხელანმა "მედია-ნიუსს" განუცხადა, შემდგომი ნაბიჯების შესახებ ენერგეტიკოსები საზოგადოებას რამდენიმე დღეში ამცნობენ.

მედია-ნიუსი