ცნობილი ბრიტანელი მოგზაური, მწერალი და მეცნიერი, ოქსფორდის უნივერსიტეტის გეოგრაფიის ფაკულტეტის კურსდამთავრებული, რომელმაც 1984 წელს არგონავტების მიერ განვლილი მარშრუტი გაიარა, 30 წლის შემდეგ, თავის თანამოაზრეებთან ერთად, კვლავ ესტუმრა საქართველოს. ტიმ სევერინს, საქართველოში ვიზიტის ფარგლებში, საქართველოს მეცნიერებათა ეროვნულმა აკადემიამაც უმასპინძლა. მეცნიერებათა აკადემიის პრეზიდენტი, აკადემიკოსი გიორგი კვესიტაძე, ვიცე-პრეზიდენტები თემურ ნანეიშვილი და როინ მეტრეველი, აკადემიკოსი თამაზ გამყრელიძე და ვალერი ასათიანი (ასოციაცია "კულტურათა დიალოგი - XX|") სტუმრებს მათი ვიზიტის, ქართული ღვინისა და ტრადიციების შესახებ ესაუბრნენ. მეცნიერებათა აკადემიის პრეზიდენტმა გიორგი კვესიტაძემ მათ "ქართლის ცხოვრების" ინგლისურენოვანი გამოცემა გადასცა საჩუქრად.
როგორც ჩვენთან საუბარში ბრიტანელმა სტუმრებმა - ჯონ ქლოუქმა, მარკ რიჩარდსმა, პიტერ დობსმა და ქომაქ ო, კონორმა აღნიშნეს, - 30 წლის შემდეგ ნანახი საქართველო გაცილებით პროგრესული და განვითარებულია.