თავისუფლების მოედანზე საკრებულოს პირველი სხდომის დასრულების შემდეგ საკრებულოს ახალი თავმჯდომარე გიორგი ალიბეგაშვილი პირველი მოადგილე გიორგი ტყემალაძესთან ერთად ლერმონტოვის ქუჩა 10 ნომერში, ამჟამად არსებულ თბილისის საკრებულოს შენობაში მივიდა, სადაც მას საკრებულოს ყოფილი თავმჯდომარე ირაკლი შიხიაშვილი დახვდა.
ირაკლი შიხიაშვილი გიორგი ალიბეგაშვილს საკრებულოს თავმჯდომარის კაბინეტში შეუძღვა და მას და მის გუნდს საკრებულოში წარმატებები უსურვა.
კაბინეტის გადაბარების შემდეგ, ყოფილმა და ახალმა თავმჯდომარეებმა ჟურნალისტებისათვის კომენტარი გააკეთეს.
საკრებულოს ახალი თავმჯდომარე მიიჩნევს, რომ კოალიცია "ქართული ოცნების" წევრებმა საჭიროა, მოახდინონ კონსოლიდაცია და ქართული საზოგადოების გაერთიანება, რადგან უამისოდ ქალაქის წინსვლა გართულდება.
- მე იმედი მაქვს, რომ ოპოზიციური პარტიები და სხვები, რომლებიც შემოსული არიან თბილისის საკრებულოში მხარს დაგვიჭერენ. ჩვენი დედაქალაქის საკრებულო უნდა იყოს სიმპათიური და მიმზიდველი თითოეული თბილისელისათვის. როგორც იქნება ჩვენი დედაქალაქი, ისეთი იქნება სხვა თვითმმართველი ქალაქები და ჩვენი ქვეყანა. ამის ამოცანა დავისახეთ და ერთიანი ძალებით შევეცდებით, რომ ეს განვახორციელოთ, - აღნიშნა გიორგი ალიბეგაშვილმა.