პირადი ავტომობილები ძირითადად თავმჯდომარისა და მოადგილეების ოჯახის წევრებს ხმარდება, - ამის შესახებ პრესკონფერენციაზე საკრებულოს დამოუკიდებელმა დეპუტატმა ალეკო ელისაშვილმა განაცხადა. მისი თქმით, საკრებულოს ემსახურება 38 მანქანა, რომლისთვისაც გამოყოფილია 432 000 ლარის საწვავი.
- დღეში იხარჯება იმდენი საწვავი, რაც პატრულის ეკიპაჟისთვის. რეალურად, თავმჯდომარე და მისი მოადგილეები, მანქანას ძირითადად მოიხმარენ სამსახურში მოსასვლელად და წასასვლელად. დანარჩენი საწვავი იხარჯება მათი ოჯახის წევრების, ახლობლების აგარაკზე, მაღაზიებში, ბაზრობასა და სხვა ადგილებში წასაყვანად, - განაცხადა ელისაშვილმა.
მისივე თქმით, საკრებულოს თავმჯდომარე უნდა ფიქრობდეს ხარჯების შემცირებაზე.
- საკრებულოს თავმჯდომარის განცხადება ვნახე, რომ ქვეყანა როცა დამშვიდდება, მერე იტყვის უარს ასეთ რამეებზე. ქვეყნები იმიტომ განვითარდნენ, რომ მერებმა, მინისტრებმა, ხელისუფლების წარმომადგენლებმა უარი თქვეს ძვირადღირებულ ავტომობილებზე და დადიან ფეხით, ველისიპედით, მეტროთი და ა.შ. შევარდნაძის ჩინოვნიკები ცალ-ცალი კალოშით მოვიდნენ და მილიონერები გახდნენ, სააკაშვილის ჩინოვნიკები ფეხშიშველები - და მულტიმილიონერები გახდნენ, ახლა კი ახალი მთავრობა ცდილობს, რომ მილიონერები გახდნენ, - განაცხადა ელისაშვილმა.
მისივე ინფორმაციით, საკრებულოში, წინა მოწვევის მსგავსად, "ქართული ოცნება" აპირებს 12 ფრაქციის, ხოლო "ნაციონალური მოძრაობა" 2 ფრაქციის შექმნას, რომ თავმჯდომარეებმა ავტომობილებით იარონ.
რაც შეეხება "სითი პარკის" საკითხს, როგორც ელისაშვილი აცხადებს, ის ამ საკითხსაც დააყენებს საკრებულოში.
- ყველაფერი, რაც არეულდარეულია ქალაქში, უნდა გამოსწორდეს. ძალიან კარგია, რომ მამუკა ახვლედიანი არის საკრებულოს წევრი, რომელიც არის "სითი პარკთან" დადებული დანაშაულებრივი გარიგების ერთ-ერთი მთავარი ფიგურა. დავსვამთ ახვლედიანს და მოვაყოლებთ რა და როგორ იყო, - აღნიშნა ელისაშვილმა.
7 7 7
საკრებულოს დამოუკიდებელი დეპუტატის, ალეკო ელისაშვილის ინფორმაციით, აუცილებლად მოხდება საკრებულოს თანამშრომლების ოპტიმიზაცია. როგორც ელისაშვილმა პრესკონფერენციაზე განაცხადა, თანამდებობებიდან უნდა გათავისუფლდნენ "ნაციონალური მოძრაობის" მიერ მიყვანილი არაფრის მაქნისი კადრები.
- ჩემი ინფორმაციით, საკრებულოს თანამშრომლების ოპტიმიზაცია გარდაუვალი იქნება. ჩემ ფუნქციას ვხედავ იმაში, რომ "ნაციონალური მოძრაობის" მიერ მიყვანილი არაფრის მაქნისი თანამშრომლები არ უნდა მუშაობდნენ. სამწუხაროდ, ასეთი ბევრია. კვალიფიციური ადამიანები, მხოლოდ და მხოლოდ იმიტომ, რომ ისინი "ნაციონალური მოძრაობის" დროს მუშაობდნენ, არ უნდა დაიჩაგრონ და მათ უნდა გააგრძელონ მუშაობა, - განაცხადა ელისაშვილმა.
მისივე თქმით, მიმდინარეობს მუშაობა თუ რა სახით მოხდება ოპტიმიზაცია.

ინტერპრესი