თურქულმა მხარემ ოშკის ტაძრის სარესტავრაციო-სარეკონსტრუქციო პროექტები მოამზადა. ამის შესახებ "ინტერპრესნიუსს" ხელოვნებათმცოდნე ირინე გივიაშვილმა განუცხადა, რომელიც საქართველოს კულტურის სამინისტროდან იმ ჯგუფის წევრი იყო, რომელიც იშხნის ტაძრის რეაბილიტაციაზე მეთვალყურეობას ახორციელებდა.
ირინე გივიაშვილი ასევე, თურქეთის თხოვნით, კონსულტირებას უწევდა ოშკის პროექტირების სამუშაოებს.
ხელოვნებათმცოდნის თქმით, ოშკის სარესტავრაციო-სარეკონსტრუქციო პროექტების განხილვა უკვე მიმდინარეობს და საჩქაროა, რომ ამ განხილვებში ქართული მხარე მონაწილეობდეს.
"ახლა დროა, მოვითხოვოთ ამ პროექტის განხილვა ქართველ ექსპერტთა მონაწილეობით. ამის შემდეგ დაიწყება ოშკის ტაძრის რეაბილიტაცია, თუმცა, კონკრეტული დრო ჯერ უცნობია. რეაბილიტაციის დაწყება დამოკიდებული იქნება ორ ქვეყანას შორის საერთო კულტურის ძეგლების მოვლა-პატრონობის შესახებ ხელშეკრულების გაფორმებაზეც. თუ ჩვენ არ ვიღებთ ამაში მონაწილეობას, მაშინ თურქული მხარე თვითონ გადაწყვეტს, როდის დაიწყოს რესტავრაცია და ალბათ, ინფორმაცია ამასთან დაკავშირებით შეზღუდულად გვექნება. ჩვენი ჩართულობა დამოკიდებული იქნება იმაზე, ხელშეკრულება ორ ქვეყანას შორის გაფორმდება თუ არა", - დასძინა ირინე გივიაშვილმა.
მან საქართველოსა და თურქეთს შორის გასაფორმებელი ხელშეკრულების მნიშვნელობაზეც გაამახვილა ყურადღება და აღნიშნა, რომ ეს პროცესი ახლა გაყინულია.
ხელოვნებათმცოდნის თქმით, საერთო კულტურის ძეგლების რესტავრაცია-აღდგენის შესახებ საქართველოსა და თურქეთს შორის გასაფორმებელი ხელშეკრულება განსაზღვრავს რა პასუხისმგებლობას აიღებს ქართული და თურქული მხარეები საკუთარი თუ მეზობელი ქვეყნის ტერიტორიაზე არსებული საერთო მემკვიდრეობის დაცვაზე.
"რა თქმა უნდა, ჩვენ ვიცით, რომ ეს ქართული ტაძრებია და ეს თურქულმა მხარემ, ასევე საერთაშორისო აკადემიურ წრეებშიც კარგად იციან, მაგრამ როდესაც ეს პროტოკოლით იქნება გაფორმებული, საუბარი აღარ იქნება ამ ეკლესია-მონასტრების წარმომავლობის შესახებ. მოგეხსენებათ, ბოლო დროს არაერთხელ გამაღიზიანებლად აღინიშნა, რომ ეს არ არის ქართული კულტურის ძეგლები, არამედ სომხებს თავისი წილი აქვთ მათ მშენებლობაში. ეს ითქვა ოშკზე, იშხანზე, ბანაზე და ბევრს სხვა ტაძარზე, რომელიც თურქეთის ტერიტორიაზეა. სახელმწიფოთაშორის ხელშეკრულების გაფორმებით მათ სხვა სტატუსი ექნებათ და ამით ჩვენ ამ მემკვიდრეობაზე პასუხისმგებლობას ვიღებთ. ამით ორი ქვეყანა ამ საერთო მემკვიდრეობას აღიარებს." დასძინა გივიაშვილმა.
მისივე თქმით, თურქული მხარე ხელშეკრულების გაფორმების პირობად ახალციხის მედრესზე უხეში ჩარევის გამოსწორების მოთხოვნას აყენებს, ასევე აზიზის მეჩეთის მშენებლობას.