"პალერმოს" მცველი მორის კაროციერი კოკაინზე ჩავარდა. 28 წლის ფეხბურთელი ძირითადი შემადგენლობის მოთამაშეა.

5 აპრილს "ტორინოსთან" მატჩის შემდეგ კაროციერიმ დოპინგ-ტესტი გაიარა და ანალიზმა კოკაინის კვალი აღმოაჩინა. ამის შესახებ იტალიის ოლიმპიურმა კომიტეტმა განაცხადა.

"გაოგნებულები ვართ - თქვა კლუბის პრეზიდენტმა მაურიციო ძამპარინიმ - ჩვენ მუდმივად ვებრძვით აკრძალული პრეპარატების გამოყენებას, რომლებიც ახალგაზრდების ჯანმრთელობას ვნებენ. ძალიან სამწუხარო ცნობა მოგვივიდა ოლიმპიური კომიტეტისგან და საწყენია, რომ ახალგაზრდა ფეხბურთელები, რომლებიც ღამის კლუბებში დადიან, ასე იდიოტურად ერთობიან.

ეს მათ სპორტულ ცხოვრებას არაფერს მატებს და ორგანიზმსაც იფუჭებენ. თუ ეს მართალია და კაროციერიმ კოკაინი მიიღო, უნდა აღიაროს".

პალერმოელს, სულ მცირე, ორწლიანი დისკვალიფიკაცია ელის.