მესხეთი 0:3 ვიტ ჯორჯია

ვიტელებმა დამაჯერებლად დაამარცხეს ახალციხის "მესხეთი" და ერთპიროვნულად ლიდერობენ გათამაშების ცხრილს.

არადა, ამ შეხვედრას მასპინძელთათვის დიდი მნიშვნელობა ჰქონდა - წინა დღეს ხომ "გაგრამ" და "სპარტაკმა" სამ-სამი ქულა აიღეს და...

"ვიტ ჯორჯიამ" აქტიურად დაიწყო თამაში და მე-10 წუთზე დაწინაურდა კიდეც. გიორგი ბერიაშვილი მეკარესთან პირისპირ დარჩა და 0:1.

პირველი ტაიმი ასეც ჩამთავრდა, განსაკუთრებული მომენტი არც ერთ კართან შექმნილა, შესვენების განახლებიდან ათიოდ წუთში კი ისევ სტუმრებმა იმარჯვეს და ისევ ბერიაშვილმა გამოიჩინა თავი - 0:2.

აბა, ახალციხელებს ამის შემდეგ რაღა შანსი ექნებოდათ, პირიქით, კვლავ ვიტელები ყოჩაღობდნენ და ეს დაუფასდათ კიდეც - ლუკა რაზმაძემ თავისივე წაქცევისთვის დანიშნული პენალტი გამოიყენა.

"ვიტ ჯორჯია" უკვე ოთხი ქულით უსწრებს თბილისის "დინამოს", თუმცა მომდევნო ტურში ისვენებს და მთელი თვალ-ყური ბოლნისისკენ ექნება მიმართული, სადაც "დინამოს" ურთულესი მატჩი ელის "სიონთან".

მოკლედ, ჩემპიონობისთვის ბრძოლა გადამწყვეტ ფაზაში შედის და ვნახოთ, როგორი სხვაობით შეხვდებიან "ვიტ ჯორჯია" და "დინამო" 10 მაისს, დღეს, როცა ერთმანეთთან შეხვედრაში მოუწევთ უძლიერესის გარკვევა.