ლოკომოტივი 0:1 გაგრა

ჩემპიონატი ფინიშისკენ მიიწევს და ეგრეთ წოდებული "უცნაური ანგარიშებიც" მომრავლდა.

უმაღლეს ლიგაში დასარჩენად მებრძოლმა "გაგრამ" უმნიშვნელოვანესი სამი ქულა აართვა უმოტივაციო "ლოკომოტივს" და იმედი ერთხელაც შეიმაგრა.

ძნელი სათქმელია, მოახერხებენ თუ არა გაგრელები ლიგაში ადგილის შენარჩუნებას, თუმცა საამისოდ ძალ-ღონეს რომ არ იშურებენ, ფაქტია.

მატჩამდე გახშირებული ხმებით, ვიქტორ კაშჩეის შეგირდებს უპრობლემოდ უნდა აეღოთ სამი ქულა და ასეც მოხდა.

იმასაც ნუ დავივიწყებთ, რომ უცხოურ საბუქმეიკერო კანტორებში "გაგრას" კატასტროფულად უმცირდებოდა კოეფიციენტი, რაც სწორედ იმას ნიშნავს, რომ მისი მოგება უფრო და უფრო იოლად გამოსაცნობი ხდებოდა.

მოკლედ, ასეა თუ ისე, ამ საქმეს ბოლომდე მიმყოლი არ უჩანს და გინდ ასე წერე, გინდ ისე...

სტუმრებმა აქტიურად დაიწყეს შეხვედრა და 33-ე წუთზე ვლადიმერ გაბედავას წაქცევისთვის პენალტი დაინიშნა. გიორგი ტყეშელაშვილმა ეს შანსი ქარს გაატანა - ბურთი კარს ააცილა!

ამის შემდეგ "ლოკომოტივის" ჯერი დადგა და ძნელი სათქმელია, რატომ ვერ მოახერხეს კახა მახარაძემ, ირაკლი ჩირიკაშვილმა, რევაზ წულაძემ და შალვა კვანტალიანმა გოლების გატანა.

ეს იყო და, თბილისელებს ნიგერიელმა ოვონიკოკო აბაიომი სეუნიმაც "აუბა მხარი" - აკაკი კუპრეიშვილის პასით მეკარესთან პირისპირ დარჩა, მაგრამ... ააცილა.

შესვენების შემდეგ "გაგრა" უფრო მხნედ ათამაშდა და 67-ე წუთზე ნანატრი გოლიც გაიტანა - ვლადიმერ გაბედავამ ჩვეულად გაისროლა - 0:1.

მოგვიანებით თამაზ ჩარგეიშვილს შეეძლო თავის გამოჩენა, მაგრამ ვერ მოახერხა და გუნდებიც ასე დაშორდნენ ერთმანეთს.

"გაგრამ" შეძლო სამშვიდობო ადგილზე გადასვლა, თუმცა კონკურენტ ახალციხის "მესხეთზე" მეტი თამაში აქვს ჩატარებული და...

ვნახოთ, ვისი აჯობებს...