ეს რჩეული კი არა, არჩეულია!საქართველოს ეროვნული ნაკრების თავკაცმა ექტორ რაულ კუპერმა 21 აპრილს მორიგი "სამშაბათობა" ჩაატარა.

არგენტინელ სპეციალისტს სულ 16 ფეხბურთელი ჰყავდა გამოძახებული, რომელთაგან მხოლოდ დავით სირაძეა უგუნდოდ - რუმინულ "სტიაუაში" მისი გადასვლა არ ხერხდება.

მეკარეები: გიორგი ლომაია (ლოკომოტივი), გრიგოლ ბედიაშვილი (ვიტ ჯორჯია), როინ კვასხვაძე (ზესტაფონი);

მცველები: უჩა ლობჟანიძე (ზესტაფონი), გურამ კაშია (დინამო), დავით გიგაური (გაგრა), ალექსანდრე კვახაძე (ვიტ ჯორჯია);

ნახევარმცველები: ლუკა რაზმაძე (ვიტ ჯორჯია), მურთაზ დაუშვილი (ზესტაფონი), გიორგი ცხადაია (გაგრა), ლევან ხმალაძე (დინამო), გიორგი სეთურიძე (ოლიმპი), ირაკლი კლიმიაშვილი (ვიტ ჯორჯია);

თავდამსხმელები: გიორგი მერებაშვილი (დინამო), დავით სირაძე (უგუნდოდ).

საგურამოში ჩატარებული წვრთნისას ორი უსიამოვნო ამბავი მოხდა: ალექსანდრე კვახაძემ ფეხი გადაიბრუნა, მურთაზ დაუშვილმა კი კუნთი დაიზიანა და მათ ვარჯიშის გაგრძელება ვეღარ მოახერხეს.

და კიდევ: როგორც ჩანს, კუპერმა უკვე აარჩია "სასამშაბათო" ბირთვი და მხოლოდ მათ იძახებს ხოლმე. არადა, თავიდან ითქვა, რომ ის ყოველ ტურში თავგამოჩენილ ფეხბურთელებს მიიწვევდა, რაც ამ ბიჭებს მოტივაციას გაუზრდიდა.

დავიჯეროთ, ყოველ ტურში ერთიდაიგივე ფეხბურთელები მოსწონს კუპერს. მაშ, რაღა აზრი აქვს თამაშებზე მის სიარულს, თუ ისედაც წინასწარ იცის, რომელი 16 ფეხბურთელი მოეწონება. ცოტა არ იყოს, უცნაურია...