წინა კვირაში საქართველოს ფეხბურთის ფედერაციას უეფადან ავსტრიელი იოჰან ჰანტჩაი სტუმრობდა და ამ ვიზიტის მიზანი საქართველოს ფეხბურთის ფედერაციის სამსაჯო კომიტეტისთვის კონსულტაციის გაწევა გახლდათ. დაგეგმილია, რომ ჩვენი ფედერაცია უეფას მსაჯთა კონვენციას მიუერთდება და ჰანტჩაის სტუმრობაც ამან განაპირობა.

ქართულ შთაბეჭდილებებს ავსტრიელი ჩინოვნიკი უეფას წარუდგენს და ჩვენც უეფასგან პასუხს დაველოდებით კონვენციასთან მიერთების თაობაზე.

რა სარგებლობა უნდა მოუტანოს ქართულ ფეხბურთს ამ კონვენციამ, ამის თაობაზე სამსაჯო კომიტეტის თავმჯდომარის მოადგილეს, ავთანდილ შალამბერიძეს ვკითხეთ. საუბარი კი სხვა თემით დავიწყეთ - 29 მაისს შალამბერიძე და ფიფას არბიტრი ლევან ფანიაშვილი ვენაში გაემგზავრებიან, სადაც ფიფა-უეფას მსაჯთა ინსტრუქტორების გაერთიანებული სემინარი ჩატარდება...

- ამგვარი სემინარები პერიოდულად ტარდება ხოლმე. მისი მიზანია, მსაჯები და მსაჯთა დამკვირვებლები იმ სიახლეებს გავეცნოთ, რომლებსაც ფიფა და უეფა ნერგავს.

- კონკრეტულად თუ იცით, რა სიახლეებზე იქნება ლაპარაკი.

- ლაპარაკი იქნება, მაგალითად, როგორ უნდა მოიქცეს მსაჯი მოედანზე წარმოქმნილი კონფლიქტური სიტუაციებისას; როგორ უნდა შეაფასოს დამკვირვებელმა მსაჯის მუშაობა...

- თქვენთან ერთად ვენაში ლევან ფანიაშვილიც იქნება, რომელიც შარშან ავარიაში მოხვედრის მერე მკურნალობდა...

- საბედნიეროდ, ფანიაშვილი უკვე გამოჯანმრთელდა და ვარჯიშიც დაიწყო. სულ მალე ტესტებსაც გაივლის და იმედი გვაქვს, მსაჯობასაც მალე განაახლებს. თავდაპირველად ლევანი დაბალ ლიგას მოემსახურება, სეზონის ბოლოსკენ კი უმაღლეს ლიგაშიც დაბრუნდება.

- იოჰან ჰანტჩაის სფფ-ში სტუმრობას რა მიზნები ჰქონდა.

- ის თბილისში უეფას წარმომადგენლის სტატუსით ჩამოვიდა, ისე კი, ავსტრიის ფეხბურთის ფედერაციის სამსაჯო კომიტეტის თავმჯდომარეა. ფედერაციის პრეზიდენტ ნოდარ ახალკაცს, გენერალურ მდივან რევაზ არველაძეს, სამსაჯო კომიტეტის თავმჯომარე ამირან კაჭახიძეს შეხვდა. საუბარი ჩვენი ფედერაციის უეფას სამსაჯო კონვენციასთან მიერთებას ეხებოდა.

ჰანტჩაისგან რჩევები მივიღეთ და ჩვენი მოსაზრებებიც გავაცანით, თუ რა გვჭირდება მუშაობის გასაუმჯობესებლად.

- ხომ ვერ დაგვიზუსტებთ.

- მაგალითად, გვჭირდება ტექნიკური აღჭურვილობა მსაჯებისთვის - ყურსასმენებს და სიგნალიან ალმებს ვგულისხმობ. ჩვენ ვამზადებთ სრულ ნუსხას, თუ რა არის საჭირო. ამას უეფაში განიხილავენ და ბიუჯეტსაც დაგეგმავენ. იმ შემთხვევაში, თუ უეფას სამსაჯო კონვენციაში მიგვიღებენ, სოლიდური დაფინანსება გვექნება. ამითაც არის მნიშვნელოვანი ჩვენთვის ეს კონვენცია.

- რამდენად დიდია შანსი, რომ ამ კონვენციას მივუერთდებით.

- რა თქმა უნდა, დიდი იმედი გვაქვს, რასაც იოჰან ჰანტჩაის ვიზიტიც ადასტურებს. აქვე გეტყვით, რომ ამჟამად ამ კონვენციაში 17 ევროპული ფედერაციაა გაერთიანებული.