OPENTEXT.ORG.GE

სარბიელი

2009-05-03

კარგის ცუდი გაგრძელება: ზაზა ფაჩულია კრის ქუინთან ორთაბრძოლაში

ზაზა ფაჩულიას "ატლანტამ" კარგად კი დაიწყო პლეი ოფი, მაგრამ გაგრძელება სახარბიელო ვერ გამოუვიდა. შეგახსენებთ, რომ პირველ მატჩში ატლანტელებმა "მაიამის" ოდენ 64 ქულა ჩააგდებინეს და ერთგვარი ანტირეკორდი დაამყარებინეს, აი, სერიის მეორე შეხვედრაში კი სტუმრებმა ასქულიან ზღვარს გადააბიჯეს და ატლანტელები 109:93 დაამარცხეს.

ამ მატჩში ზაზა კვლავ არ ყოფილა სასტარტო ხუთეულში, ჯამში კი მოედანზე 15 წუთი დაჰყო და 3-3 ქულა და მოხსნა მიითვალა. ეს უკან გადადგმული ნაბიჯია, თუ გავიხსენებთ, რომ აღმოსავლეთ კონფერენციის პირველ მეოთხედფინალურ შეხვედრაში ზაზამ ორმაგი დუბლი შეასრულა - 10 ქულას ამდენივე მოხსნა შემატა.

მეორე მატში ზაზამ სამჯერ სტყორცნა ორქულიანი ზონიდან და ამათგან მხოლოდ ერთი ჩააგდო. ორი საჯარიმოდან კი ერთი გამოიყენა.

ამ მატჩში კი შეუჩერებელი გახლდათ მაიამელი დუეინ ვეიდი, ვინაც რეგულარულ ჩემპიონატში საშუალოდ 30,2 ქულას აგროვებდა (საუკეთესო შედეგი), "ატლანას" კი ამ ჯერზე 33 ქულა ჩაუგდო. სწორედ ვეიდის სიზუსტემ გატეხა ფაჩულიას გუნდი, რომლის საუკეთესო მსროლელმა ჯოშ სმიტმა ოდენ 17 ქულა მიითვალა.

მოგეხსენებათ, სერია ოთხ მოგებამდეა. ორი ატლანტური მატჩის მერე ანგარიში 1:1 იყო და გუშინ გამთენიისას გუნდებმა მაიამიში ითამაშეს.

ამ მატჩში "ატლანტამ" კიდევ უფრო დიდი ანგარიშით წააგო და ახლა თავად არის მდევარი. ზაზა კვლავ არ ყოფილა სასტარტო ხუთეულში, სულ 24:29 წუთი ითამაშა და 8 ქულა და 7 მოხსნა მიითვალა.

მომდევნო, მეოთხე შეხვედრა ისევ მაიამიში ჩატარდება, ჩვენი დროთ 28 აპრილს გამთენიისას. და რაკი უკვე ნათელია, რომ ოთხი მატჩი გამარჯვებულის გამოსავლენად საკმარისი არ არის, მეხუთე თამაში ისევ ატლანტაში იქნება 3 მაისს.