თბილისში უკვე მეექვსე დღეა, ტყიბულის ბატალიონის ოფიცრები შიმშილობენ. მათი მოთხოვნა სოციალურია და კუთვნილ გაუცემელ ხელფასებს ითხოვენ. მოშიმშილეები შინაგან ძალებში აღარ მუშაობენ. მათ განცხადება კარგა ხანია, დაწერეს, თუმცა, კუთვნილი ხელფასების გასასტუმრებლად არავის შეუწუხებია თავი.

მოშიმშილეები შინაგანი ჯარების სარდალს - გია შერვაშიძეს შეხვდნენ, თუმცა, სანუგეშო პასუხი მისგანაც ვერ მიიღეს. ყოფილი მებრძოლები სარდალს არც ამტყუნებენ, ფინანსთა სამინისტრომ თუ არ გამოყო ფული, გია შერვაშიძემ საიდან გააჩინოსო. მოშიმშილეები შინაგანი ჯარების სარდალთან და ფინანსთა მინისტრთან შეხვედრას ითხოვენ, რათა საბოლოოდ გაარკვიონ, გადაურიცხა თუ არა ფინანსთა სამინისტრომ შინაგან ჯარებს საჭირო თანხა, ხოლო თუ გადარიცხა, ვინ შეჭამა?

- ჩვენ ბრძოლაში გამოცდილი ხალხი ვართ. ხვალ ქვეყანამ აფხაზეთის დაბრუნება ომით რომ გადაწყვიტოს, იარაღს ავისხამთ და საბრძოლველად მაინც წავალთ. რატომ არ სურს სახელმწიფოს გაგვიფრთხილდეს? ამბობენ, ტყიბულის ბატალიონის ხალხი შიმშილობსო, არადა, აქ ქსნის, თელავის და სხვა ბატალიონების ოფიცრებიც არიან. იცით, კიდევ რა გვიკვირს, ჩვენთან ასეთი შემთხვევა იყო, თანხა სამხედრო მოსამსახურეთა გარკვეულ ნაწილს მისცეს, ნაწილს კი არა, შემდეგ გვითხრეს, ხელფასები გაიყინაო, იქნებ, ჩვენმა ხელისუფლებამ აგვიხსნას, როგორ იყინება ჩვენი ხელფასები? გარდა ამისა, ტელევიზიით მოვისმინე, მაისის ბიუჯეტი შესრულდაო. თუ შესრულდა, პენსია-ხელფასების გაცემა რატომ ყოვნდება? - ეს გულისტკივილია, რომელსაც ომში გამოცდილი მებრძოლები აღარ მალავენ.

მოშიმშილეები აცხადებენ, რომ შიმშილობას მხოლოდ იმ შემთხვევაში შეწყვეტენ, თუ მათი ხელფასების პრობლემა მოგვარდება.