მსოფლიოში განთქმულმა გერმანელმა ჩოგბურთელმა ბორის ბეკერმა სპორტული ტანსაცმლის წარმოებას მიჰყო ხელი. 2003 წლის თებერვალში ევროპაში უკვე გაყიდვაში გამოვა BB -ს ფირმის ტანსაცმლის პირველი კოლექცია. აღნიშნულ საქონელს კომპანია Pრო-შპორტ დაამზადებს და ბეკერი საკუთარ ნაწარმს მთელი წელი რეკლამას გაუკეთებს. ამასთან, იგი მოლაპარაკებას აწარმოებს ავტოგიგანტ "დაიმლერ-ბენცთან" მას კვლავ სურს "მერსედესის" ავტომობილის რეკლამირება, რასაც წარმატებით აკეთებდა მაშინ, როცა მოქმედი სპორტსმენი იყო.

გარდა ამისა, ბორის ბეკერი ჰამბურგში გამომავალი ჟურნალ "ჩოგბურთის" გამომცემელი გახდა. მან განაცხადა, რომ სურს ამ გამოცემის ირგვლივ გერმანული ჩოგბურთის ძალები გააერთიანოს და მას ახალი სული შთაბეროს. ხოლო ჟურნალის შეფ-რედაქტორი კი მკითხველს დაჰპირდა, რომ უიმბლდონის სამგზის მომგებ ბეკერზე მასალებს არ მოაკლებს.

აღსანიშნავია, რომ გამომცემელს ჟურნალში თავისი სვეტი ექნება, რომელშიც მკითხველს მსოფლიო ჩოგბურთში მიმდინარე პროცესებზე საკუთარ აზრს გაუზიარებს. "მე ჩოგბურთის გავლენის ქვეშ ვცხოვრობდი, თითქოს ნარკოტიკების ქვეშ მეძინა, ტურნირიდან ტურნირზე ვმოგზაურობდი, ისე, რომ არ ვიცოდი ყველაფერი როგორ დასრულდებოდა. ყველაფერი თითქოს ბურუსით იყო მოცული", - აღიარა ბეკერმა თავის პირველ სვეტში. როგორც ჩანს, ბურუსი უკვე გაიფანტა, რადგან მას აქტიური სპორტისაკენ გული აღარ მიუწევს და ბიზნესს მიჰყო ხელი.

სხვათა შორის, ბევრი თვლის, რომ ბოლოდროინდელი სკანდალების შემდეგ ბეკერმა სამეწარმეო საქმიანობისათვის ძალა ასე უცებ რომ გამონახა, გმირობის ტოლფასია. მართლაც, ჯერ იყო და მუქკანიან მეუღლეს ბარბარას გაეყარა, შემდეგ გადასახადების გადაუხდელობის გამო სასამართლოში მოხვდა და თან წარუმატებელი სასიყვარულო თავგადასავლებიც არ დაიკლო. ყველაფერ ამას დიდი ფინანსური დანაკარგები მოჰყვა და როგორც ჩანს, ბორისი ანგარიშების შევსებას ბიზნესში წარმატებებით ლამობს.