საქართველოს კულტურის უმნიშვნელოვანესი კერა - X|X საუკუნის მეორე ნახევარში სამეგრელოს უკანასკნელი დედოფლის ეკატერინე ჭავჭავაძის მიერ გაშენებული ბოტანიკური ბაღი თითქმის სამი წელიწადი ელოდა პატრონს. არადა, სწორედ ამ უპატრონობის გამო ეს უნიკალური ბაღი თითქმის გავერანდა.

საქართველოს მეცნიერებათა აკადემიის დაქვემდებარებიდან ბაღის გამოსვლის შემდეგ ვერა და ვერ დადგინდა, თუ ვის ეკუთვნოდა იგი - კულტურის, ეკონომიკის სამინისტროებს თუ ადგილობრივ მმართველობას. იყო ლაპარაკი ბაღის გასხვისებაზეც. ამ გაუგებრობაში სამსახურიდან დაითხოვეს ბაღის თანამშრომლები, რომლებიც შვილივით ელოლიავებოდნენ დადიანების დიდებულ მამულს. მოუვლელობის გამო ბაღი ქვეწარმავლებისა და მავნებლების საბუდარი გახდა.

ბოტანიკური ბაღის ასეთი მძიმე მდგომარეობით ზუგდიდელები ძალიან შეწუხდნენ. ადგილობრივი ხელისუფლება შეჰყურებდა თბილისს, კულტურის სამინისტროს, რომელიც თურმე მეპატრონე ყოფილა ბოტანიკური ბაღისა.

საზოგადოება "ზუგდიდელის" თავმჯდომარემ ოთარ ფაცაციამ, ზუგდიდის მაჟორიტარმა დეპუტატმა ფრიდონ თოდუამ და ზუგდიდის მუნიციპალიტეტის გამგებელმა ალექსანდრე ქობალიამ ამ დღეებში მიიღეს ერთობლივი გადაწყვეტილება ბოტანიკური ბაღის მძიმე მდგომარეობიდან გამოყვანის შესახებ.

ამ გადაწყვეტილების თანახმად ზუგდიდის მუნიციპალიტეტის გამგეობა დააფინანსებს ბოტანიკურ ბაღს, ყოველთვიურად ადგილობრივი ბიუჯეტიდან 5. 000 ლარი გამოიყოფა.

გადაწყვეტილება მიღებულია, ახლა მთავარია მისი შესრულება.

აქვე ერთი საკითხიც, - საინტერესოა, რაღა ეშველება ბოტანიკურ ბაღსა და დადიანების მუზეუმს შორის მდებარე ასევე განადგურებულ და გაჩანაგებულ ღია კინოთეატრს. ეს მშვენიერი "თეატრონი" 2003 წელს ზუგდიდის მაშინდელმა მაჟორიტარმა დეპუტატმა გოჩა ფიფიამ საკუთარი სახსრებით ააშენა და ზუგდიდელებს აჩუქა.

"ვარდების რევოლუციის" შემდეგ, როდესაც ზუგდიდის მნიშვნელოვანი ობიექტები გალამაზდა, "თეატრონისთვის" არავის მიუხედავს, პირიქით, სცენა და სკამები აყარეს და მოიპარეს. გაჩანაგებული ტერიტორია ისევ ეკალბარდებმა დაფარა. მიზეზად იმას ასახელებენ, რომ ხელისუფლებისთვის "არასასურველი" პიროვნების მიერ აშენებული ობიექტი თითქოს საინტერესო და მისაღები არ იყოს...