საქართველოში ორი საუკუნის განმავლობაში მყოფი რუსი სამხედროები ერთგვარ საახალწლო საჩუქარს გვიმზადებენ- თბილისიდან გაჰყავთ თავისი ერთ-ერთი ბოლო სამხედრო დანაყოფი! ქართულმა მასმედიამ ამ დანაყოფის გაყვანა რატომღაც ძალზე უმნიშვნელოდ შეაფასა, თუმცა სინამდვილე ცოტა სხვანაირია- ერთი შეხედვით ამიერკავკასიაში რუსეთის ჯარების დაჯგუფების- UHDP-ს შემადგენლობაში მყოფი 193-კაციანი სამხედრო დანაყოფი შეიძლება მართლაც არაფერს ნიშნავდეს, მაგრამ მთავარია, რა სახისაა ის. ჩვენი ინფორმაციით, იგი გახლავთ 566-ე კავშირგაბმულობის ცალკეული ბატალიონი, რომლის შეიარაღებაშია 5 ერთეული მობილური რადიოსადგური H-145 კავშირგაბმულობის გარეშე კი ვერც ერთი შტაბი ვერ იმუშავებს, მით უმეტეს, UHDP-ი. ამიტომაც ჩნდება ეჭვი, რომ 566-ე კავშირგაბმულობის ცალკეულ ბატალიონს (სწორედ მას, რომელიც ემსახურებოდა UHDP-ს შტაბს დახურული კავშირის დასამყარებლად მოსკოვში) მალე თავად UHDP-ს შტაბიც მიჰყვება მეზობელ სომხეთში.

სომხეთში UHDP-ს ძირითადი ძალის გადატანა, ერთი მხრივ, მისაღებია ჩვენთვის, მაგრამ ეს ამბავი ჩვენი მეზობლისა და სტრატეგიული (ბაქო-ჯეიჰანის ნავთობსადენის თვალსაზრისით) აზერბაიჯანის მკვეთრ შეშფოთებას იწვევს.

გასულ კვირას, თბილისში ოფიციალური ვიზიტით მყოფმა აზერბაიჯანის რესპუბლიკის თავდაცვის მინისტრმა საფარ აბიევმა, რომელსაც, სხვათა შორის, უკვე ჰქონდა ინფორმაცია რუსული სამხედრო დანაყოფების საქართველოდან სომხეთში გადანაცვლების შესახებ, უარყოფითად შეაფასა ეს ფაქტი- ყოველივე ამით სომხეთი იგებსო.

566-ე კავშირგაბმულობის ცალკეული ბატალიონი, ისევე როგორც დანარჩენი ნაწილები, შეერწყმებიან სომხეთში, გიუმრიში განთავსებულ 102-ე რუსულ სამხედრო ბაზას და არ აღმოჩნდებიან სომეხ სამხედროთა ხელში, რისიც ასე ეშინია ბაქოს. თუმცა, მეორე მხრივ, ერევანში, სომხეთის თავდაცვის სამინისტროში, ამ სტატიის ავტორს კერძო საუბარში სომხეთის არმიის ერთ-ერთმა მაღალჩინოსანმა არც ისე ორაზროვნად უთხრა: სად წავლენ რუსი სამხედროები, თუკი რამე დაგვჭირდება, ისედაც გამოვართმევთო!