გუშინ საქართველოში რუსი ჟურნალისტების ჩამოსვლას სერიოზული ინციდენტი მოჰყვა. ერთ-ერთი მათგანი მაქსიმ შევჩენკო თბილისშია და ახლად აშენებულ, ხუთვარსკვლავიან სასტუმრო "რედისონში" გამართულ რუსეთ-საქართველოს საზოგადოებრივ შეხვედრასაც ესწრებოდა. შეხვედრა მედიაჰოლდინგ "ჯორჯიან თაიმსის" პრეზიდენტ მალხაზ გულაშვილის ინიციატივით გაიმართა. სიტყვით გამოვიდნენ მამუკა არეშიძე, თენგიზ პაჭკორია, მამუკა ქავთარაძე, ალან კასაევი, პეტრე მამრაძე...

მედიაჰოლდინგის პრეზიდენტმა მალხაზ გულაშვილმა განაცხადა, რომ იგი სოსო ჯაჭვლიანთან, მამუკა ქავთარაძესთან, მეუფე პეტრესთან და სხვა პიროვნებებთან ერთად 2008 წლის დეკემბერში მოსკოვში იმყოფებოდა, საზოგადოებრივ პალატაში შეხვედრის დროს პალატის წევრებს სთხოვეს, რომ რუსეთ-საქართველოს ურთიერთობა რაღაც დონეზე შეცვლილიყო, საჰაერო მიმოსვლა აღდგენილიყო და ქართული პროდუქტები რუსულ ბაზარს დაბრუნებოდა. ამასთან, რაც ყველაზე მნიშვნელოვანია - ისაუბრეს ლტოლვილებისთვის დახმარების აღმოჩენაზე. მალხაზ გულაშვილი მამუკა არეშიძესთან ერთად იმყოფებოდა მინსკში, ყარაბახში და ასევე პერიოდულად შეხვედრებს ესწრებოდა სხვადასხვა ქვეყანაში. ბატონმა მალხაზმა განმარტა, რომ სომხეთი და აზერბაიჯანი არ არის აღფრთოვანებული მათი შეხვედრებით, მაგრამ უარყოფითი ნაბიჯი ჯერ არ გადაუდგამთ. საქართველოს ტერიტორიის მნიშვნელოვანი ნაწილი ოკუპირებულია, საერთაშორისო გეოპოლიტიკურ სისტემაში სწორი გზა უნდა ვიპოვოთ. 2000 წლის შემდეგ რუსეთში მოვიდა პატრიოტული ძალა, რომელიც, ჩემი აზრით, არავის არ დაანებებს ქვეყნის დანგრევას, - განაცხადა მალხაზ გულაშვილმა.

შეხვედრის დასასრულს კი მედიაჰოლდინგ "ჯორჯიან თაიმსის" პრეზიდენტმა კიდევ ერთხელ დასძინა, რომ საქართველომ უნდა აირჩიოს ნეიტრალური პოზიცია, ის არ უნდა გაწევრდეს არც ერთ სამხედრო ბლოკში, ამას მხოლოდ საქართველოს დანგრევა მოჰყვება.