OPENTEXT.ORG.GE

11x11

2011-08-30

ნეიტრალთა სამზადისი

"ნაპოლის" საიტისთვის მიცემულ ინტერვიუში, შვეიცარიელმა ნახევარმცველებმა ბლერიმ ჟემაილიმ და გიოკჰან ინლერმა ნეაპოლურ ყოფაზე, სამომავლო მიზნებზე და ერთად თამაშზე ისაუბრეს.

- სხვადასხვა იტალიურ გუნდში ასპარეზობით, კალჩოს ჩემპიონატს გაუშინაურდით. ამიერიდან ორივე "ნაპოლის" სამსახურში იქნებით.
ჟემაილი: კამპანიურ გუნდში გადასვლას ჩემს კარიერაში წინ გადადგმულ ნაბიჯად მივიჩნევ. "ტორინოში" და "პარმაში" გარკვეული გამოცდილება დავაგროვე, რაც მაღალ დონეზე ბურთაობაში დამეხმარება.
ინლერი: არავის ეწყინება თუ ვიტყვი, რომ "უდინეზესა" და "ნაპოლის" შორის უზარმაზარი სხვაობაა. გულშემატკივრებს დიეგო მარადონას ნეაპოლური ეპოქა დღემდე ახსოვთ. ამბიციურობითაც გამოირჩევიან, რის გამოც მათთან საერთო ენის გამონახვა გამიადვილდა.
- "ნაპოლის" ყველა ფეხბურთელი ტიფოზებში უზომო პოპულარობით სარგებლობს. თქვენს შემთხვევაში როგორ არის?
ჟემაილი: გამუდმებით ავტოგრაფების დარიგება და ფოტოების გადაღება მოსაბეზრებელია, მაგრამ რას ვიზამთ, ესეც ფეხბურთის შემადგენელი ნაწილია. ახლახან ჩატარებულ ამხანაგურ მატჩს 40 ათასი ქომაგი დაესწრო. არადა, კარგად იცით, იტალიის მასშტაბით ამ მხრივ რა პრობლემაცაა.
ინლერი: "ამასთან "ნაპოლიში" გადასვლისას წინასწარ უნდა იყო შეგუებული.
- შვეიცარიის ნაკრებში მხარდამხარ თამაშობთ. რამდენად მნიშვნელოვანია თქვენთვის ის ფაქტი, რომ გუნდშიც ერთად იქნებით?
ჟემაილი: ეს ყველასთვის მომგებიანია. ოტმარ ჰიცფელდს ჩვენს შეთამაშებაზე დროის დაკარგვა აღარ მოუწევს.
ინლერი: ბლერიმს საკმაო ხანია ვიცნობ და მოედანზე ერთმანეთს თვალდახუჭული ვუგებთ. თუ ვალტერ მაცარი ძირითად შემადგენლობაში ორივეს დაგვაყენებს, "ნაპოლის" დიდ სარგებლობას მოვუტანთ.
- მომდევნო სეზონი საკმაოდ მომქანცველი იქნება.
ჟემაილი: გეთანხმებით. აქეთ სერია A, იტალიის თასი და ჩემპიონთა ლიგა, იქით ევროპის ჩემპიონატის შესარჩევი ეტაპი. ხანდახან კვირაში რამდენიმე მატჩის გამართვა მოგვიწევს. გუნდში 26 მეტნაკლებად თანაბარი ძალის ფეხბურთელი ირიცხება და მწვრთნელი პერიოდულად, ძალების აღსადგენად, როტაციას მიმართავს. სანერვიულო არაფერია.
ინლერი: მხარ-თეძოზე წამოწოლას სიბერეშიც მოვასწრებთ. სანამ ახალგაზრდები ვართ, ფეხბურთისგან მაქსიმალური სიამოვნება უნდა მივიღოთ. "უდინეზეში" წნეხში და გადატვირთულ რეჯიმში თამაშს შევეჩვიე და ამ მხრივ არც "ნაპოლიში" გამიჭირდება. მთავარია, ძალები სათანადოდ გადავანაწილოთ.