ბატონო გიორგი,
თქვენმა გაბედულმა, მართლაც ყველასაგან და პირველ რიგში თვით ივანიშვილისგან დამოუკიდებლად გადადგმულმა ნაბიჯმა - თქვენს აშკარად უკანონო შევიწროებაზე ამოგეღოთ ხმა და ეს თუნდაც იმით გამოგეხატათ, რომ საკუთარი გადაწყვეტილებით სამუშაოდ გადასულიყავით პრეზიდენტის რეზიდენციაში, მეც საბოლოოდ გადამაწყვეტინა ჩემი ამ ნაბიჯის გადადგმა.
ჩემი ეს ნაბიჯი კი შემდეგში მდგომარეობს. ბევრი ფიქრისა და, პირველ რიგში ჩემიანების - დედაჩემ გიული ალასანიას, მეუღლე სანდრა რულოვსის, მზია ბებიას და ბიძაჩემ თემურ ალასანიას რჩევით მივედი იმ აზრამდე, რომ უარი მეთქვა ჩემს ადრინდელ გადაწყვეტილებაზე და, როგორც კანონმორჩილი მოქალაქე, აუცილებლად ჩამოვსულიყავი საქართველოში, რათა ხმამაღლა, მსოფლიო საზოგადოების გასაგონად დავამტკიცო, თუ რაოდენ ცილისმწამებლურია ამჟამინდელი საქართველოს ხელისუფლების დამოკიდებულება პირადად როგორც ჩემ, ისე საერთოდ ნაციონალების მიმართ.
მე ჩვენს უდანაშაულობაზე არ მაქვს ლაპარაკი. ეს წყალგაუვალი ფაქტია, რასაც ისტორიაც დაადასტურებს. მე შევეცდები, როგორც მოწმემ, კიდევ ერთხელ ყველას დავანახვო, თუ რა გაუგონარ სოციალურ სიმაღლეზე აიყვანა საქართველო ჩვენმა თითქმის ათწლიანმა დაუღალავმა შრომამ. ამას დღეს ყველა ხედავს და, უწინარესად, თვითონ ქართველი ხალხი, რომელმაც ჩვენი წყალობით გემო გაუგო, თუ რას ნიშნავს შემდგარი სახელმწიფო.
აქვე ისიც უნდა აღვნიშნო, რომ, დიდად სამწუხაროდ, საზღვარი არა აქვს "ქართული ოცნების" უმადურობას და პოლიტიკურ შანტაჟს - რაც ამ ათი წლის მანძილზე კარგი გაგვიკეთებია, ყველაფერი წყალს გაატანონ და, "კარგი რატომ აგიგიას" პრინციპით, დამნაშავედაც კი გამოგვიყვანა. მაგრამ ეს ნამდვილად არ გამოუვათ, რადგან ამქვეყნად უკვე აღარ ბნელა.
თქვენ, როგორც ჩანს, უკვე მიხვდით, ვისთანაც გაქვთ საქმე და უთუოდ იმასაც მიხვედრილი იქნებით, რაც ამჟამად ხდება ჩემს წინააღმდეგ.
ამიტომ ჩემი კატეგორიული თხოვნაა (იქნებ მოთხოვნაც), რომ პირადად დაესწროთ ჩემს დაკითხვას ივანიშვილის პროკურატურაში, სადაც ამ დღეებში აუცილებლად ვაპირებ მისვლას არა მარტო როგორც მოწმე, არამედ როგორც ბრალმდებელიც, რომელსაც გაღმა შედავების ახლა უკვე ძალიან მოძველებული პრინციპით მედავებიან.
მეც და ჩემი თანამოაზრენიც აშკარად ვხედავთ, საით მიჰყავს ჩვენი, როგორც იტყვიან, წვითა და დაგვით აშენებული ქვეყანა კოალიცია "ქართულ ოცნებას", ჩვენ ამას არ დავუშვებთ. კიევის მაიდანი მოგონილი იქნება. დღეს უკვე აშკარაა, რომ ქართველ ხალხს საკეთილოდ აეხილა თვალი.
ჩამოსვლის თარიღს დამატებით შეგატყობინებთ.

მოწმეც და ბრალმდებელიც მიხეილ სააკაშვილი
კიევი, 31 მარტი.

p.s. რედაქცია გულწრფელ მადლობას უხდის ქვეყნის პრეზიდენტს ბატონ გიორგი მარგველაშვილს ამ დეპეშა-წერილის ექსკლუზიურად ჩვენი რედაქციისათვის გადმოცემის გამო.