- თუ საქართველოს პრემიერს არ უნდა, მოუსმინოს ევროკავშირში საუკეთესო მეგობრებს, ეს მისი არჩევანია და გავითვალისწინებთ!
ეს შვედეთის საგარეო საქმეთა მინისტრის კარლ ბილწ... უჰ, კიდევ ერთხელ უკაცრავად, ბილდტის სიტყვებია, რითაც იგი "ტვიტერზე" გამოეხმაურა საქართველოს პრემიერ-მინისტრს ირაკლი ღარიბაშვილს.
რა უნდოდა ჩვენს პრემიერს კარლისგან (გვარი შეგნებულად არ ვახსენე, რათა კვლავ მოსაბოდიშებლად არ გამხდომოდა საქმე!).
"ეს არის სააკაშვილის მეგობართა კლუბი, რომელთაც აქვთ გარკვეული "მეგობრული" ვალდებულებები და ისინი უბრალოდ თანაგრძნობას გამოხატავენ. მარტივად ასეა. მათ, სამწუხაროდ, არ იცოდნენ (თუ არ უნდოდათ, რომ სცოდნოდათ - "სრ" რედძ ის საშინელებები, რაც ხდებოდა საქართველოში წლების განმავლობაში"...
აი, ასე ახსნა ირაკლი ღარიბაშვილმა ის კრიტიკა, რაც მიხეილ სააკაშვილის მიმართ სისხლის სამართლებრივი დევნის დაწყების თაობაზე კარლმა (მის გვარს აწი ვერვინ წამომაცდენინებს!ძ და მისმა ლიტველმა კოლეგამ ლინას ლინკევიჩიუსმა გამოთქვეს.
აუჰ, როგორ მწარედ გაითვალისწინებენ ამას კარლი და მისი აწ უკვე ორიოდე კინკილა ევროპელი თანამოაზრენი!
მე კი, პირადად, ერთი რამ მაინტერესებს: უთუოდ ანგარიშგასაწევი ქვეყნის - შვედეთის საგარეო საქმეთა მინისტრის პოსტი უბრალო თანამდებობა სულაც არ არის და ამდენად მის პოზიცია-გამონათქვამებზე ვერვინ იტყვის, კუმ ფეხი გამოყოო, მაგრამ მაინც უნდა ვიკითხო: შვედეთს ხომ ჰყავს სახელმწიფოს ფორმალური მეთაური - მეფე, ხომ ჰყავს პარლამენტი, რომელიც ირჩევს პრემიერ-მინისტრს, ხომ ჰყავს ვიცე-პრემიერებიც დარგების მიხედვით და ა. შ..
მართალია, საგარეო ურთიერთობებს კარლის უწყება განაგებს, მაგრამ, თუ მისი პოზიცია ქვეყნის პოზიციაა, ზემოთ დასახელებულნი ერთხელ მაინც არაფერს არ უნდა ამბობდნენ.
ამ შემთხვევაში სულაც არა, ძვირფასო კარლ, ერთი, ალბათ, შენთვისაც ნაცნობი ფრაზა მინდა შეგახსენო. მითხარი, ვისთან მეგობრობ და გეტყვი, ვინცა ხარო!
ამის გათვალისწინებით, შენ, რაკი მიშას მეგობარი ხარ, ჩვენთვის მეგობრად ვერ გამოდგები და ვერც შენი გამონათქვამებით ვიხელმძღვანელებთ!
და, რაც მთავარია, თუ ჩვენს ქვეყანას შვედეთში და, მით უფრო, ევროკავშირში, შენზე და ლინასზე უკეთესი, "საუკეთესო მეგობრები" არ ჰყვანან, დავღუპულვართ და ისაა!
და ბოლოს, რაკი, როგორც ამბობენ, გამინისტრებამდე მიშა-ნაციონალთა ლობისტურ კომპანიას ხელმძღვანელობდი (რა თქმა უნდა, არა ოდენ მათი ლამაზი თვალების გამო!), ამიტომ უნდა მივიღოთ უაპელაციოდ შენი, ამჯერად ბოდიშს არ მოგიხდი, ყოველგვარი "ნაადვოკატარი.
წადი, გაიარე, კარლ, ოღონდ ფრთხილად, რამეს ფეხი არ წამოჰკრა!
კანონზე მაღლა, რაგინდ მაღალი და გრძელიც არ უნდა იყოს, ჩვენთან არავინ არ დგას!
აი, უბრალოდ, ამ კურსს ადგას დემოკრატიისკენ მიმავალი საქართველო!