აბუსელიძე როინ

როინ აბუსელიძე

აბუსელიძე როინ − (1988), ქართველი პოეტი. დაიბადა ბათუმში, 1988 წლის 25 ივლისს. 2005 წელს დაამთავრა ბათუმის აკაკი წერეთლის სახელობის 22-ე სკოლა, შემდეგ სწავლა განაგრძო ბათუმის შოთა რუსთაველის სახელობის უნივერსიტეტში (2005-2009). წერა დაიწყო 14 წლის ასაკში, იბეჭდება ჟურნალ-გაზეთებში: „ჭოროხი“ „ლიტერატურული პალიტრა“. 2010 წელს გამოსცა კრებული – „ოცდაერთის გამოღმა და ოცდაერთის გაღმა“. ამავე წელს გამოიცა მისი და მისი სამი მეგობრის ლექსების კრებული „ა ბ გ დ”. 2011 წელს გამოვიდა კიდევ ერთი კრებული „მეცხრე ტალღა“, რომელშიც მისი და კიდევ რვა ბათუმელი პოეტის ლექსები შევიდა; 2014 წელს გამოსცა კრებული „ჰოლი“ და აუდიო წიგნი „ჰამაკი“.

იანვარია, მგონი, ქუჩებში...

იანვარია, მგონი, ქუჩებში

და ჩამოუსხამს ყინვა ყალიბად,

მე კი ვერაფრით გადავურჩები,

ახლა იმდენად ერთი ცალი ვარ.

ამ თოვლს, ამ ყინვას და ყველაფერ „ამ“-ს,

რაც უშენობას სიკვდილს ურითმავს,

ვიკლავ ბუხართან და ცხელ საფერავს

ვსვამ დახვრეტილი ხელისგულიდან.

როგორც ეს თოვლი ზეცას მიფშვნილი,

ისე მარტივად ვქრები ამ ბოლოს,

მხოლოდ სტრიქონებს გიწერ სიმშვიდით,

უმუხტოსა და უმეტაფოროს,

ჩვენ არ შევცვლილვართ წლების შემდეგაც,

ეს ლექსიც იმედს აღარ გვითესავს,

რადგან იგივე არის შედეგი

მე კვლავ პაჟი ვარ, შენ კი − პრინცესა.

წყარო

ქართველი პოეტები (ენციკლოპედია)