ეიფელის კოშკი
ეიფელის კოშკი –ამაყად გვახსენებს XIX საუკუნის საფრანგეთის პროგრესისადმი რწმენას და ცივილიზაციის სრულყოფაში მეცნიერებისა და ტექნოლოგიების წამყვან როლს. 300 მეტრის სიმაღლის კოშკი გუსტავ ეიფელმა (Gustave Eiffel, 1832-1923) პარიზის 1889 წლის მსოფლიო გამოფენის ერთგვარ მონუმენტურ კარიბჭედ დააპროექტა და ააგო. იმ დროისათვის ეს იყო ყველაზე მაღალი კონსტრუქცია მსოფლიოში, უფრო მაღალი, ვიდრე ეგვიპტური პირამიდები ან გოთიკური კათედრალები.
ეიფელის კოშკი XIX საუკუნის მეორე ნახევრის ევროპასა და შეერთებულ შტატებში დაახლოებით 20-ზე მეტ საერთაშორისო ბაზრობას შორის ერთ-ერთის, პარიზის მსოფლიო გამოფენის მთავარი სანახაობაც იყო. ეს ბაზრობა-გამოფენები საერთაშორისო ინდუსტრიის, მეცნიერების, გამოყენებითი და დეკორატიული ხელოვნების, სახვითი ხელოვნების გამოცდილების გასაზიარებლად და მათ წარმოსაჩენად ტარდებოდა. ფრანგი ხალხის ეროვნულ სიამაყეს - ეიფელის კოშკს საინჟინრო, ტექნოლოგიურ და ინდუსტრიულ სფეროებში საფრანგეთის უპირატესობისა და სიძლიერის დემონსტრირება უნდა მოეხდინა. თავდაპირველად დროებით ნაგებობად ჩაფიქრებული ეიფელის კოშკი პარიზში დღემდე დგას.
პირველი გამოხმაურება ეიფელის კოშკზე არაერთგვაროვანი იყო. 1887 წელს 47 მწერლის, მუსიკოსისა და მხატვრისგან შემდგარმა ჯგუფმა "ლე ტემპსმა" (Le Temps) დაწერა წერილი, რომელშიც ხელოვნების მოღვაწენი ეიფელის კოშკს "ქარხნის შავ და გიგანტურ კვამლსადენს" უწოდებდნენ და ამ "უზარმაზარი უსარგებლო კონსტრუქციის" აგებას აპროტესტებდნენ. გუსტავ ეიფელი კი ჯიუტად ამტკიცებდა: "მჯერა, კოშკი დროთა განმავლობაში შეიძენს მომხიბლელობას" და "დაგვანახებს რომ ჩვენ (ფრანგები) მხოლოდ გართობის მოყვარული ხალხი როდი ვართ, არამედ, ინჟინერთა ქვეყანაც ვართ". მართლაც, როდესაც ეიფელის კოშკის მშენებლობა დასრულდა, ის მალევე იქცა ხელოვანებს შორის მოწინავე აზროვნებისა და მოდერნულობის საერთაშორისო სიმბოლოდ და საზოგადოებაც მისით, როგორც საუცხოო სანახაობით, აღტაცებული იყო. დღეს ის პარიზის სიმბოლოდაა მიჩნეული.
ეიფელის კოშკი 1889 წელს ქალაქის ერთ-ერთი ყველაზე პოპულალური ნაგებობა იყო ფოტოგადაღებებისთვის. კოშკის თვალუწვდენელი სიმაღლე მის ძირში მდებარე პაწაწინა შენობებს ჩრდილავდა. პროფესიონალი და მოყვარული ფოტოგრაფების მიერ გადაღებული ეიფელის კოშკის ფოტოები მსოფლიო გამოფენის ათასობით დამთვალიერებელმა იყიდა. აქ წარმოდგენილ 1889 წლის მარტის მიწურულს გადაღებულ ფოტოზე კოშკის მშენებლობა დასასრულს უახლოვდება, მშენებლები უკანასკნელ სამუშაოებს ასრულებენ. თუ დავაკვირდებით, კოშკის ძირში კარგად ჩანს ბაზრის ორი რიგის სწრაფად ნაშენი კონსტრუქცია, რომელსაც 6 მაისისთვის, ბაზრობის გახსნის დღისათვის, ამზადებენ.
