ოთხმხრივი შეთანხმება დასავლეთ ბერლინის შესახებ 1971
ოთხმხრივი შეთანხმება დასავლეთ ბერლინის შესახებ – ხელი მოაწერეს 3. IX გერმანიაში მოკავშირეთა საკონტროლო საბჭოს რეზიდენციაში, ბერლინის ამერიკულ სექტორში სსრკ-ის, აშშ-ის, დიდი ბრიტანეთისა და საფრანგეთის წარმომადგენლებმა: ძალაში შევიდა ოთხმხრივი დასკვნითი ოქმით 3.IV.1972.
შეთანხმების I ნაწილში მისმა მონაწილეებმა განაცხადეს, რომ „შეეცდებიან ხელი შეუწყონ დაძაბულობის მოხსნას და გართულებების თავიდან აცილებას“. დასავლეთ ბერლინთან დაკავშირებით, არ გამოიყენებენ ძალას ანდა ძალის მუქარას ამ რაიონში და სადავო საკითხებს გადაწყვეტენ მხოლოდ მშვიდობიანი მეთოდებით. იმავდროულად ხაზგასმული იყო, რომ 4 მთავრობა „პატივს სცემდა ერთმანეთის ინდივიდუალურ და ერთობლივ უფლებებსა და პასუხისმგებლობას, რომლებიც უცვლელი რჩებოდა“.
შეთანხმების II ნაწილში ჩამოყალიბებული იყო ზოგადი პრინციპები, რომლებითაც მხარეებს უნდა ეხელმძღვანელათ გდრ-ს, გფრ-სა და დასავლეთ ბერლინს შორის სამოქალაქო სატრანზიტო მიმოსვლის საკითხებში. II ნაწილის ცენტრალური დებულება იყო დადგენილება იმის თაობაზე, რომ ბერლინის დასავლეთი სექტორები „წინანდებურად არ წარმოადგენდა გერმანიის ფედერაციული რესპუბლიკის შემადგენელ ნაწილს და მომავალშიც მათ არ მართავდა ეს ქვეყანა“. შეთანხმებამ განსაზღვრა, რომ აშშ-ის, დიდი ბრიტანეთის და საფრანგეთის მთავრობები ინარჩუნებდნენ თავის უფლებებს და პასუხისმგებლობას ბერლინის დასავლეთ სექტორების და მისი მუდმივი მცხოვრებლების ინტერესების საზღვარგარეთ წარმომადგენლობის საკითხში, მათ შორის უფლებებსა და პასუხისმგებლობას უშიშროების და სტატუსის საკითხთა მიმართ როგორც საერთაშორისო ორგანიზაციებში, ისე სხვა ქვეყნებთან ურთიერთობაში. იმ პირობით, რომ არ შეეხებოდა სტატუსისა და უშიშროების საკითხებს, გფრ-ს მიეცა დასავლეთ ბერლინის მუდმივ მცხოვრებთა საკონსულო მომსახურების უფლება, დასავლეთ ბერლინზე გავრცელდებოდა გფრ-ის მიერ დადებული საერთაშორისო შეთანხმებები, გფრ წარმოადგენდა დასავლეთ ბერლინის ინტერესებს საერთაშორისო ორგანიზაციებსა და საერთაშორისო კონფერენციებზე.
დასკვნითი ოთხმხრივი ოქმი (13.VI.1972) ითვალისწინებდა, რომ ის შეთანხმებები, რომლებიც დაიდო გდრ-ს, გფრ-ს და დასავლეთ ბერლინის სენატს შორის (კერძოდ, გდრ-ის და გფრ-ის შეთანხმება გფრ-სა და დასავლეთ ბერლინს შორის სამოქალაქო პირთა და ტვირთების სატრანზიტო კავშირის შესახებ 17XII.1971) ძალაში შევიდა ოთხმხრივ შეთანხმებასთან ერთად.
