პერშინგის ექსპედიცია 1916-17
პერშინგის ექსპედიცია 1916-17 – აშშ-ის შეიარაღებული ინტერვენცია მექსიკაში, რომელიც მიზნად ისახავდა 1910 დაწყებული მექსიკის რევოლუციის პარალიზებას და ამერიკული მონოპოლიების პოზიციების განმტკიცებას ამ ქვეყანაში. მის ფორმალურ საბაბად იქცა 9.III.1916 აშშ-ის მიერ პროვოცირებული მექსიკელი პარტიზანების თავდასხმა ამერიკის სასაზღვრო ქალაქ კოლუმბუსზე. 15.III.1916 აშშ-ის ჯარები გენერალ ჯ. ჯ. პერშინგის მეთაურობით მექსიკის ტერიტორიაზე შეიჭრნენ, თითქოსდა „დამსჯელი ექსპედიციის“ ჩასატარებლად, სინამდვილეში აშშ-მა განახორციელა ინტერვენცია, რომელმაც მექსიკელთა შეუპოვარი წინააღმდეგობა გამოიწვია. ასეთი წინააღმდეგობის, მექსიკის მთავრობის გადამწყვეტი მოქმედებების, სხვადასხვა ქვეყნებში, მათ შორის აშშ-ში მექსიკის დასაცავად გაშლილი ფართო კამპანიის პირობებში, ასევე პირველ მსოფლიო ომში ჩასაბმელად აშშ-ის მომზადებასთან დაკავშირებით ამერიკის მთავრობა იძულებული გახდა, 1916 წლის სექტემბერში დაეწყო მოლაპარაკებები მექსიკიდან ჯარების გამოყვანის თაობაზე, ამერიკული ჯარების ევაკუაცია დაიწყო 1917 წლის იანვარში და დასრულდა იმავე წლის 5.II.
