გვასალია ლაშა

00:42, 26 თებერვალი 2022-ის ვერსია

გვასალია ლაშა – (1973), მწერალი და პოეტი. დაიბადა სოფელ პირველ გურიფულში (ხობი). 1989 წელს დაამთავრა ხობის #1 საშუალო სკოლა, 1995 წელს კი _ თბილისის სახელმწიფო უნივერსიტეტი. გამოცემული აქვს 8 პოეტური და პროზაული კრებული.

ჩემი სოფელი

ჯორკოზე იჯდა ბაბუაჩემი

და გაჰყურებდა შორეთს მდუმარი,

ცაზე ღრუბლების ცურავდა გემი -

მიუწვდომელი ლურჯი სტუმარი...

სევდიანობდა ეზო და კარი,

ძაღლსაც თათებში თავი ჩაერგო,

ეზინთებოდა ქვა-ღობეს ხარი,

მე კი პატარას ვეღარ გამეგო -

რა სატკივილო მოგვენთო ასე,

ბებო უსიტყვოდ მჭადის ფქვილს ცრიდა,

და ირგვლივეთი ღიმილით სავსე

ჩამოღრუბლდა და მეჩვენა ციდად!..

შევიტყვე მერე, ძილისწინ მგონი,

მეზობელს თურმე მოუკვდა ბიძა,

და მდუმარებდა ესე სოფელი -

წეს-ჩვეულების მორდუ და ძიძა!..

წყარო

ქართველი პოეტები (ენციკლოპედია)