ჩინეთის დიდი კედელი

მიმდინარე ცვლილება 13:25, 28 ოქტომბერი 2022 მდგომარეობით

ჩინეთის დიდი კედელი

ჩინეთის დიდი კედელი – (ინგლ. Great Wall of China), გამაგრებული კედელი ჩრდილოეთ ჩინეთში, ძველი ჩინური საინჟინრო ხელოვნების გრანდიოზული ძეგლი. კედლის სიგრძე განსუს პროვინციიდან (დასავლეთში) ლაოდუნის ყურემდე (აღმოსავლეთში) შეადგენს დაახლოებით 4 ათ. კმ-ს (ცალკეული განშტოებების ჩათვლით 8 ათ. კმ-ზე მეტს), სიმაღლე – 5-დან 10 მ-მდეა, სიგანე – 5-8 მ. გამაგრებათა სისტემა შეიქმნა მომთაბარე ტომთა თავდასხმების შესაკავებლად, თუმცა მას ყოველთვის ეფექტურად ვერ იყენებდნენ.

კედლის ცალკეული მონაკვეთები სხვადასხვა პერიოდებშია აშენებული. მშენებლობა დაიწყო, ძვ. წ.აღ. III საუკუნეში, იმპერატორ ცინ ში-ხუანდის (ცინების დისტანცია) დროს და გრძელდებოდა თითქმის XVII საუკუნემდე. საშენ მასალად გამოყენებული იყო ბუნებრივი ქვა, ღორღი, მთის მაგარი ქანები და მერქანი. კედლის მშენებლობა თავდაპირველად მიმდინარეობდა ქვის მშრალი წყობით, შემდეგ კი კირისა და თაბაშირის დუღაბის გამოყენებით. ჩინეთს კედელი იცავდა ჩრდილოეთის მომთაბარე ტომების (მონღოლები, თურქები, თათრები და სხვ.) თავდასხმებისაგან.

ჩინეთის დიდი კედელი ადმინისტრაციული და სტრატეგიული თვალსაზრისით იყოფოდა 9 მონაკვეთად. გარდა ძირითადი, თავდაცვითი, ფუნქციისა, იგი აიოლებდა საზღვრისპირა მოსახლეობის კონტროლს, ხოლო მასზე გატარებული გზა უსაფრთხო გასავლელი იყო.

[რედაქტირება] წყარო

ქართული სამხედრო ენციკლოპედიური ლექსიკონი
სამშენებლო ენციკლოპედიური ლექსიკონი