ნეხო I
ნეხო I – ეგვიპტის XXVI დინასტიის ფარაონი (ძვ.წ. 672-664 წწ.).
ნეხო I რეალურად ასურელების მთავარი ნაცვალი იყო ჩრდილოეთ ეგვიპტეში. ასურელები დიდხანს არ დარჩენილან ეგვიპტეში, რადგან ამ ქვეყნის მართვის პირდაპირი კონტროლი, როგორც მათ სავარაუდოდ მიიჩნიეს, ძალიან დიდ ძალისხმევას მოითხოვდა, და ეს საქმე ჯერ კიდევ მათ შემოჭრამდე დაქუცმაცებული დელტის „მეფეებს“ მიანდეს, რომლებიც, მათი ვარაუდით, მათდამი ერთგულები იქნებოდნენ. მაგრამ ასურელების წასვლისთანავე დელტის მმართველები კვლავ ტახარკას მიუბრუნდნენ. ასურელების რეაქცია ძალიან სწრაფი იყო: მათ დაატყვევეს დელტის მმართველები, მათ შორის საისის, მენდესის და პელუზიუმის მმართველი ელიტა, და სიკვდილით დასაჯეს, ზოგი ეგვიპტეში, ზოგი კი ნინევიაში. გადარჩა მხოლოდ საისის მმართველი ნეხო I, რომელიც ასურელებმა, სავარაუდოდ იმის გამო, რომ ის არ გადავიდა ტახარკას მხარეს, საისის მმართველად დატოვეს, მისი ვაჟიშვილი ფსამტიხი კი დანიშნეს ათრიბის მმართველად.
669 წ. ტახარკას მემკვიდრემ, ტანუტამუნიმ, რომელიც ჩრდილოეთ ეგვიპტეზე მარშით წამოვიდა ასურელებთან საბრძოლველად, მოკლა ნეხო, სავარაუდოდ, ასურელებთან კავშირის გამო. მაგრამ ასურელებმა დაამარცხეს ტანუტამანი, და ნეხოს ვაჟიშვილი ფსამტიხი (მომავალი ფსამტიხ I) ამჯერად უკვე მთელი ჩრდილოეთ ეგვიპტის მმართველად დანიშნეს. ამით ჩაეყარა საფუძველი XXVI (საისურ) დინასტიას.
