აპორტი ალექსანდრე
აპორტი ალექსანდრე – Aporta grand Alexander
აპორტი ალექსანდრე ძველი ევროპული ჯიშია, ჯერ კიდევ მე-XV საუკუნეში ცნობილი, წარმოშობით იტალიიდანაა.
გავრცელებულია როგორც სამრეწველო ჯიში კაზახთა სსრ–ში.
საქართველოს რაიონებში ძველიდანვე შემოტანილი სხვა ევროპულ ჯიშებთან ერთად. ფართოდ არსად არ არის გავრცელებული, მაგრამ მისი თითო–ოროლა ხე გვხვდება თითქმის ყველა რაიონში.
ამ ჯიშის დადებით მხარეებს შეადგენს შემდეგი ნიშანთვისებები: ხე იზრდება მძლავრად, ადრე იწყებს მოსხმას და კარგ მოსავალს იძლევა. ნაყოფი ძლიერ მსხვილია, ლამაზი შეფერვის.
ამ ჯიშის უარყოფითი მხარეებია: ნაყოფი გემოს მხრივ მიეკუთვნება სამზარეულო ჯიშს, მწიფდება არაერთდროულად და ცუდად არის მიმაგრებული ხეზე, რის გამოც ნაყოფს ქარი ჰყრის, ცუდად ინახება, რადგანაც სიდამპლე აზიანებს.
ნაყოფი მსხვილია, მომრგვალო–კონუსისებრი ან ხშირად მობრტყო–კონუსისებრი ფორმის.
ყუნწი მოკლეა და მსხვილი და ზის ღრმა და განიერ ძაბრში. ჯამი მსხვილია, ღია.
ნაყოფის კანი სქელია. მკვრივი, გლუვი.
ძირითადი მოყვითალო ფერი ემჩნევა მხოლოდ დაჩრდილულ ადგილებს, ისე კი თითქმის მთელი ნაყოფი წილადაა შეფერილი, შეფერვა ზოლისებრია. მწიფდება ოქტომბერ–ნოემბერში.
ნაყოფის ხორცი მომწვანო ფერისაა, ფხვიერი, ოდნავ წვნიანი და მჟავე გემოსი.
ხე ძლიერი ზრდისაა, ინვითარებს განიერ, გადაშლილ ვარჯს. ფოთოლი მსხვილი აქვს. ყვავილობა საშუალო პერიოდის ახასიათებს.
წყარო
საქართველოს კულტურული ფლორის ატლასი = Атлас культурной флоры Грузии = Atlas for the cultivated Flora of Georgia / ნ. ხომეზურიშვილი და ელ. ერისთავი ; საქართველოს სსრ მიწსახკომი. ლ.პ. ბერიას სახელ. სას.-სამ. ინსტიტუტი. - თბილისი : ტექნიკა და შრომა, 1939-1951. - 30 სმ[MFN: 51572] თემატიკა: - საქართველოს კულტურული ფლორის ატლასები; ტ. 2 : საქართველოს სამრეწველო ხილის ჯიშები = Промышленные сорта плодов Грузии = Varietes of commercial Georgian Fruits. - 1941. - 217, LIV გვ. : ილ., 71 ჩართ. ფურც. ფერ. ილ.. - დამატებითი თავფურცელი რუსულ, ინგლისურ ენებზე. - ტექსტი ქართულ, რუსულ, ინგლისურ ენებზე. - 73მ., ყდა 7მ., 2500ც.[MFN: 52879] UDC: 634.1/7:631.526.32 თემატიკა: - ხილის ჯიშები საქართველოში;
