თინა თათეიშვილი

დაბადების ადგილი: ქ. თბილისი.

1943–1964 წლებში იყო საქართველოს სიმღერისა და ცეკვის სახელმწიფო ანსამბლის წამყვანი სოლისტი-მოცეკვავე. ოსტატობითა და გრაციოზულობით ასრულებდა სოლო პარტიებს ცეკვებში "ქართული", "მთიულური", "მიპატიჟება"; განსაკუთრებით აღსანიშნავია მის მიერ შესრულებული ცეკვა "ქართული", რომელსაც ახასიათებდა მოძრაობათა სინაზე, სინარნარე, სიმსუბუქე და კლდემამოსილება. ქართული ცეკვების ინდივიდუალურ შემსრულებელთა პირველ რესპუბლიკურ კონკურსზე 1962 წელს  ოქროს მედალი და ლაურეატის წოდება დაიმსახურა. ასევე დიდი წარმატებით აღინიშნა მისი მონაწილეობა საქართველოს ლიტერატურის და ხელოვნების დეკადაზე მოსკოვში 1958 წელს. გასტროლებით შემოიარა სსრკ-ის მრავალი ქალაქი და საზღვარგარეთის რამდენიმე ქვეყანა. 1959 წელს ვარშავის ოპერისა და ბალეტის თეატრში გამართულ საღამოზე, რომელშიც მონაწილეობდნენ მოსკოვის დიდი თეატრის, ლენინგრადისა და თბილისის ოპერისა და ბალეტის თეატრის სოლისტები, თ. თათეიშვილისა და ნ. ღვაბერიძის მიერ შესრულებულმა ცეკვა "ქართულმა" განსაკუთრებული მოწონება დაიმსახურა. როგორც პოლონური პრესა აღნიშნავდა, "ქართველმა მოცეკვავე ქალმა უაღრესად ძუნწი შტრიხებით გვიჩვენა ივერიელი ქალის სინარნარე და სინატიფე". 

წყარო: საქართველო: ენციკლოპედია: ტ.III.–თბ., 2014.-გვ.450

• 1962 - ქართული ცეკვების ინდივიდუალურ შემსრულებელთა პირველი რესპუბლიკური კონკურსი, ოქროს მედალი
• 1958 - საქართველოს დამსახურებული არტისტი