გიორგი ასიტაშვილი

დაბადების ადგილი: ქ. თბილისი.

სწავლობდა თბილისის მე-16 საშუალო სკოლაში, ხოლო 1924-1927 წლებში-თბილისის საფაბრიკო-საქარხნო მოწაფეთა ცენტრალურ სასწავლებელში. 1927-1929 წლებში სწავლობდა შოთა რუსთაველის სახელობის თეატრთან არსებულ სტუდიაში. 1929-1948 წლებში იყო შოთა რუსთაველის სახელობის სახელმწიფო აკადემიური თეატრის მსახიობი, 1948-1951 წლებში თბილისის სარეწაო კოოპერატივის კულტურის სახლის სამხატვრო ხელმძღვანელი იყო. 1951 წელს კვლავ რუსთაველის თეატრის მსახიობია, სადაც პენსიაზე გასვლამდე იმუშავა. გიორგი ასიტაშვილი 30 წლის მანძილზე იყო სხვადასხვა კლუბებთან არსებული დრამატული წრეების ხელმძღვანელი და რეჟისორი(ნავთლუღის რკინიგზის, თბილისის მასწავლებელთა სახლის, ბორჯომის რკინიგზის კლუბების და სხვ.). 1933 წელს გიორგი ასიტაშვილი სანდრო ახმეტელმა მოსკოვში გაგზავნა ვოკალის შესასწავლად. შოთა რუსთაველის სახელობის სახელმწიფო აკადემიურ თეატრში გიორგი ასიტაშვილის მიერ შესრულებული როლებიდან აღსანიშნავია: გაბრიელ მოურავი, ივანოვი(ს. შანშიაშვილის "არსენა", "ანზორი"), ბესო(ა. სუმბათაშვილის "ღალატი"), ამირანი(გ. მდივანის "სამშობლო"), ნეზნამოვი(ა.ოსტროვსკის "უდანაშაულო დამნაშავენი"), ატამანი ლუბენკო(ა. კორნეიჩუკის "ბოგდან ხმელნიცკი"), მონტანო(უ. შექსპირის "ოტელო"), ზული(ჯ. პრისტალის "ინსპექტორი მოვიდა"), ბენ ხანანი(ა. გლებოვის "ზაგმუკი"), ჟუვი(ლ. სლავინის "ინტერვენცია") და სხვ.

წყარო: საიუბილეო თარიღები: თეატრი, მუსიკა, კინო.- თბ., 1989. -გვ.29

• 1961 - საქართველოს დამსახურებული არტისტი