გივი კიზირია

დაბადების ადგილი: ქ. თბილისი.

დაამთავრა თბილისის რკინიგზის ინჟინერთა ინსტიტუტის ხიდებისა და გვირაბების ფაკულტეტი 1949 წელს.

1949-1959წწ. მუშაობდა გეოდეზიისა და კარტოგრაფიის მთავარ სამმართველოს ტოპოგრაფიულ ტექნიკუმში მასწავლებლად, 1950-1953 წლებში - შინაგან საქმეთა სამინისტროს N12 ხიდმშენებელი რაიონის საწარმოო-საგეგმო განყოფილების უფროსად, 1953-1955 წლებში - გზებისა და ხიდების საკავშირო საპროექტო ინსტიტუტ ''სოიუზდორპროექტის'' თბილისის ფილიალში უფროს ინჟინრად, 1955-1958 წლებში მოსკოვის სატრანსპორტო მშენებლობის საპროექტო და სამეცნიერო -კვლევითი ინსტიტუტის - ''სოიუზტორნიის'' ასპირანტია, 1956-1960 წლებში - საქართველოს მეცნიერებათა აკადემიის კ. ზავრიევის სახელობის სამშენებლო მექანიკისა და სეისმომედეგობის ინსტიტუტის უფროსი მეცნიერ თანამშრომელია, 1960-1962 წლებში - კუნძულ კალიმანტანის (ინდონეზია) საგზაო ექსპედიციის ინჟინერია, სადაც მისი აქტიური მონაწილეობით ათეული კილომეტრის სიგრძის საავტომობილო გზა იქნა გაყვანილი. 1985 წლიდან - საქართველოს მეცნიერებათა აკადემიის კ. ზავრიევის სახელობის სამშენებლო მექანიკისა და სეისმომედეგობის ინსტიტუტის განყოფილების გამგეა, 1985-2001 წლებში - საქართველოს ტექნიკური უნივერსიტეტის  ხიდებისა და გვირაბების კათედრის გამგე. 130 სამეცნიერო (მათ შორის 64 ერთეული) ნაშრომის, რამდენიმე მონოგრაფიის, 2 სახელმძღვანელოს (უმაღლესი სასწავლებლებისათვის) და 10-მდე გამოგონების ავტორია; მისი ხელმძღვანელობით დაცულია 20-ზე მეტი დისერტაცია; საფუძველი ჩაუყარა სამშენებლო მექანიკის ახალ მიმართულებას კონსტრუქციათა გაანგარიშებას მასალების დეფორმაციის გათვალისწინებით; ხელმძღვანელობდა სამოქალაქო-სატრანსპორტო ნაგებობების ახალი კონსტრუქციებით დაპროექტება-მშენებლობას (დიღმის ხიდი, "ლაჯანურჰესის" კაშხალი, ვახუშტის სახელობის ხიდი და სხვა); მონაწილეობდა შენობა-ნაგებობათა ავარიების ექსპერტიზისა და აღდგენით ღონისძიებათა შემუშავებაში; განსაკუთრებით უნდა აღინიშნოს მისი ღვაწლი ბეტონის ცოცვადობის თეორიისა და გაანგარიშების მეთოდების დამუშავებაში; შეიმუშავა ცოცვადობის მოვლენის ამსახველი ისეთი გამოსახულება, რომელიც აერთიანებს მანამდე არსებულ თეორიებს, როგორც კერძო შემთხვევებს და რომელიც საფუძვლად დაედო ხანგრძლივი დეფორმაციების გათვალისწინებით ნაგებობათა გაანგარიშების მისეულ მეთოდიკას. ტექნიკის მეცნიერებათა დოქტორი, პროფესორი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.298; საქართველოს მეცნიერებისა და ტექნიკის დარგის სახელმწიფო პრემიის ლაურეატები 1993-2004 წწ. . -თბ., 2012.-გვ.158; წიგნი ღირსებისა: ტ. 2/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.133;  საქართველო: ენციკლოპედია: ტ.5. -თბ.,2023. -გვ. 22

• დისერტაციების დაცვის სპეციალიზებული საბჭო, თავმჯდომარე
• დსთ-ს სახელმწიფოთაშორისი კავშირის ხელოვნურ ნაგებობათა სექცია, თავმჯდომარე
• საქართველოს საინჟინრო აკადემია, ნამდვილი წევრი
• წინასწარდადებული რკინაბეტონის საერთაშორისო ფედერაცია, თავმჯდომარე

• 2002 - საქართველოს სახელმწიფო პრემია, მეცნიერებისა და ტექნიკის დარგში (ერთობლივი გამარჯვება)
  1980-2000 წლებში შესრულებული სამუშაოსათვის - "შენობა-ნაგებობების საიმედოობის ამაღლების კომპლექსური ღონისძიებების კვლევა და რეალიზაცია"
• 1997 - ღირსების ორდენი

• ხელოვნურ ნაგებობათა განვითარება, სახეები და დანიშნულება (Co-Author). - თბილისი, ტექნ. უნ-ტი, 2004. - 203გვ.
• შენობა-ნაგებობათა ავარიები, აღდგენა-გაძლიერება და ახალი კონსტრუქციები : დამხმარე სახელმძღვანელო (Co-Author). - თბილისი, ტექნიკური უნ-ტის გამ-ბა, 1996. - 250გვ.
• ხიდები და ნაგებობანი გზებზე : სახელმძღვ. პოლიტექნ. ინ-ტის სტუდ. (Author). - თბილისი, განათლება, 1980. - 421გვ.
• სპეციალური ნაგებობანი მთის გზებზე (Co-Author). - თბილისი, ტექნიკა და შრომა, 1954. - 72გვ.