ლევან კრავეიშვილი

დაბადების ადგილი: ქ. სამტრედია.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი საავტომობილო გზების მშენებლობის სპეციალობით 1954 წელს.

1954 წელს დაიწყო მუშაობა საკავშირო საპროექტო ინსტიტუტ "სოიუზდორპროექტის" თბილისის ფილიალში ინჟინრად; 1956 წელს საავტომობილო გზების კვლევა-ძიებითი უფროსი იყო; 1960 წელს გადაიყვანეს საავტომობილო გზების კვლევა-ძიებითი ექსპედიციის უფროსად, ხოლო 1962 წლიდან მუშაობდა პროექტის მთავარ ინჟინრტად; მის მიერ დაპროექტებული და შენებულია მცხეთის შემოვლითი გზა, თურქეთში გასასვლელი "კახაბერი-სარფის" საავტომობილო გზა, რუსეთიდან გაგრის გავლით შემოსასვლელი საავტომობილო გზის "ფსოუ-განთიადი-გაგრის" მონაკვეთი; იყო საქართველოს სამხედრო გზის ცალკეული უბნების რეკონსტრუქციის ავტორი; მისი უშუალო ხელმძღვანელობით და ტექნიკური ზედამხედველობით შესრულებულია "ანანური-ფასანაურის", "ფასანაური-მლეთას", "მლეთა-კობის", "კობი-ყაზბეგის" და "ყაზბეგი-ორჯონიკიძის" მონაკვეთების რეკონსტრუქციის პროექტები; ასევე "კუნდუზ-ფაიზაბადის" საავტომობილო გზის "კუნდუზ-ტოლუკანის" მონაკვეთი (ავღანეთში), სახელმწიფო გზების "ადლერ-განთიადის" და "ვოლგოგრად-ილოვლინკის" მონაკვეთების, უზბეკეთში "ტაშკენტ-გოლოდნაია სტეპის", ყირგიზეთის ტერიტორიაზე საავტომობილო გზა "ფრუნზე-ოშის" მთავარი მონაკვეთების მშენებლობა; წლების განმავლობაში იყო საქართველოს პოლიტექნიკური ინსტიტუტის სამშენებლო და სატრანსპორტო ფაკულტეტის ლექტორი, დოცენტი, პროფესორი. ამავე ფაკულტეტის სადიპლომო კომისიების თავმჯდომარე; 1994 წლიდან ტექნიკური უნივერსიტეტის სატრანსპორტო, საგზაო და აეროდრომების კათედრის პედაგოგია; დაჯილდოებული იყო ავღანეთის მთავრობის საპატიო სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.323-324

• საპატიო ნიშნის მედალი