ლევან მეგრელიშვილი

დაამთავრა თბილისის რკინიგზის ტრანსპორტის ინჟინერთა ინსტიტუტის სამშენებლო ფაკულტეტი 1954 წელს.

1954-1979წწ. მუშაობდა ამიერკავკასიის რკინიგზის სამმართველოს სისტემაში მშენებელ ოსტატად, სამუშაოთა მწარმოებლად, საქალაქო ნაგებობების სამსახურის მთავარ ინჟინრად, სამშენებლო ტრესტ "გზამშენის" მმართველად; 1979-1986წწ. იყო ამიერკავკასიის რკინიგზის სამმართველოს უფროსის მოადგილე; 1986-1998წწ. სამშენებლო-სამონტაჟო ტრესტ "ამიერკავკასტრანსმშენის" მმართველი, სს "ტრანსმშენის" გენერალური დირექტორი; ხელმძღვანელობდა ამიერკავკასიის რკინიგზის "მარაბდა-ახალქალაქის" 167 კმ-იანი სარკინიგზო ხაზის, თბილისის რკინიგზის სადგურის უნიკალური კომპლექსის, თბილისის ბორჯომის ვაგზლის, "ხაშური-ზესტაფონის" საუღელტეხილო უბნის ყველაზე რთული გადასარბენების, "შორაპანი-ძირულასა" და "ხარაგაული-მარელისის" მონაკვეთების რკინიგზის მეორე ლიანდაგების მშენებლობას, თბილისის კვანძის გზის მეურნეობის ობიექტების განახლება-რეკონსტრუქციას, ავჭალისა და დიდუბის სადგურების განვითარებას; მონაწილეობდა სტიქიური მოვლენების შედეგად დაზარალებულთათვის ახალქალაქის, თეთრიწყაროსა და დუშეთის რაიონებში 200-ზე მეტი საცხოვრებელი სახლის, ჭიათურაში - სკოლების, ხოლო საჩხერეში - სარკინიგზო ვაგზლის მშენებლობასა და აღდგენაში. მიღებული აქვს სსრკ მინისტრთა საბჭოს პრემია და ხალხთა მეგობრობის ორდენი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.392; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ. 652-653

• შრომის წითელი დროშის ორდენი
• ღირსების ორდენი
• საპატიო მშენებელი
• საპატიო რკინიგზელი
• საქართველოს დამსახურებული ინჟინერი