ალექსანდრე მჭედლიშვილი

დაბადების ადგილი: სოფელი ანაგა, სიღნაღის რაიონი.

დაამთავრა ამიერკავკასიის ტექნიკური ინსტიტუტი სახმელეთო ტრანსპორტის ნაგებობათა მშენებლობის სპეციალობით 1935 წელს.

1935 წლიდან მუშაობდა საავტომობილო გზების დაპროექტების საკავშირო საპროექტო ინსტიტუტ "სოიუზდორპროექტის" თბილისის ფილიალში; მონაწილეობდა საქართველოს სამხედრო გზის საუღელტეხილო მონაკვეთის ვარიანტების კვლევა-ძიებასა და დაპროექტებაში; 1942-1943წწ. იყო ამიერკავკასიის სამხედრო ოლქის ცალკეული ტოპოგრაფიული რაზმის ხელმძღვანელი და კავკასიონის მაღალმთიანეთში ასრულებდა სამხედრო კომუნიკაციების საკვლევ-საძიებო სამუშაოებს; 1945 წლიდან მუშაობდა საქართველოს გზატკეცილების მთავარ სამმართველოში; ხელმძღვანელობდა ცხრაწყაროსა და ზეკარის უღელტეხილებზე საპროექტო საძიებო სამუშაოებს; აპროექტებდა საავტომობილო გზებს აფხაზეთის, სამეგრელოსა და სვანეთის მაღალმთიან რაიონებში; 1955 წლიდან სატყეო მეურნეობის სატრანსპორტო გზების საკავშირო საპროექტო ინსტიტუტის საქართველოს ფილიალის საგზაო-საპროექტო განყოფილების უცვლელი ხელმძღვანელი იყო; მისი უშუალო მონაწილეობითა და ხელმძღვანელობით შემუშავებულ იქნა საბაგირო, საავტომობილო და რკინიგზის მრავალი პროექტი საქართველოს, ჩრდილოეთ კავკასიისა და დასავლეთ უკრაინის მაღალმთიან და ტყიან რაიონებში; მის მიერ შესრულებული პროექტები გამოირჩეოდა მაღალი პროფესიული დონითა და გარემოს მაქსიმალური დაცვით, მაშინ როდესაც ამ მიმართულების საპროექტო ნორმატივები არც კი იყო შემუშავებული; ამ მხვრივ განსაკუთრებით საყურადღებოა მის მიერ დაპროექტებული და აშენებული "სალხინო-ქვიბიას" საავტომობილო გზა სამეგრელოში, წაჩხურის ხეობის უნიკალური ბზის კორომების სრული დაცვით, მკვრივ კირქვებში ჩატარებული ბურღვა-აფეთქებითი სამუშაოებით; XX საუკუნის 60-იანი წლებიდან ხელმძღვანელობდა ტყესაზიდი სატრანსპორტო კომპლექსების დაპროექტებას დასავლეთ ციმბირში, ვოლგისპირეთში, ჩუვაშეთისა და მარის ავტონომიურ რესპუბლიკებში; არის მრავალი სახელმწიფო ჯილდოს მფლობელი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.441

• საქართველოს დამსახურებული ინჟინერი