დიმიტრი ტყეშელაშვილი

დაამთავრა საქართველოს პოლიტექნიკური ინსტიტუტის ქიმიის ფაკულტეტი 1964 წელს; საშენ მასალათა ს/კ ინსტიტუტის ასპირანტურა 1969 წელს.

1964-1966წწ. მუშაობდა თბილისის პლასტმასის ქარხანაში ოსტატად, ცვლის უფროსად, ქარხნის ცენტრალური ლაბორატორიის უფროსის მოადგილედ; საშენ მასალათა სამეცნიერო-ტექნიკურ ცენტრ "საქსაშენმასალების" პოლიმერული საშენი მასალების ლაბორატორიაში; 1979-1989წწ. მუშაობდა საქართველოს კპ თბილისის ორჯონიკიძის რაიკომში, შემდეგ ამავე რაიონში რაისაბჭოს აღმასკომის თავმჯდომარის პირველ მოადგილედ; 1989 წლიდან სამეცნიერო-ტექნიკურ ცენტრ "საქსაშენმასალების" (შემდგომში სს "საქსაშენმეცნიერება") გენერალური დირექტორის მოადგილე იყო; ასევე იყო ჟურნალ "საშენი მასალები და ნაკეთობების" მთავარი რედაქტორის მოადგილე; მუშაობდა პოლიმერული საშენი მასალების - ალკიდური და პოლივინილქლორიდის ლინოლეუმის, რუბეროიდის, პოლიეთილენის საშენი მასალების მოდიფიცირების ხარისხის გაუმჯობესების საკითხებზე; მის მიერ დამუშავებული აქტივიზებული ორგანული და არაორგანული პოლიმერული საშენი მასალების შემავსებლები სხვადასხვა დროს დაინერგა ოდესისა და ლიეპაის ლინოლეუმის, გარდაბნის მუყაო-რუბეროიდის ქარხნებსა და თბილისისა და რუსთავის საშენ მასალათა კომბინატებში; მონაწილეობდა თბილისის ლინოლეუმის (პოლივინილქლორიდის) ქარხნის ამუშავებაში; დიდი წვლილი აქვს შეტანილი ლილოს საშენ მასალათა კომბინატისა და თბილისის შპალერის ქარხნის ამუშავებისა და ადგილობრივი მასალების სამშენებლო პრაქტიკაში დანერგვის საქმეში; მიღებული აქვს სახელმწიფო ჯილდოები; ტექნიკის მეცნიერებათა დოქტორი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.533; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.175

• 1998 - ღირსების მედალი
  საქართველოში საშენმასალათა მრეწველობის განვითარების საქმეში შეტანილი პირადი დიდი წვლილისა და მაღალი პროფესიონალიზმის, ახალი სამშენებლო მასალებისა და ტექნოლოგიების დამუშავებისა და დანერგვისათვის
• საქართველოს დამსახურებული მშენებელი