სევერიან ღვინეფაძე

დაბადების ადგილი: სოფელი სიმონეთი, თერჯოლის რაიონი.

დაამთავრა საქართველოს ინდუსტრიული ინსტიტუტი ელექტრომექანიკოსის სპეციალობით 1931 წელს.

1927 წელს დაიწყო შრომითი საქმიანობა "ზაჰესის", "რიონჰესის", დასავლეთ საქართველოს 35, 110 და 220 კვ. ელექტროქვესადგურების მშენებლობაზე; 1942-1943წწ. მივლინებული იყო ყაბარდო-ბალყარეთში "ბაქსანენერგოკომბინატის" ელექტროქსელების აღდგენის სამუშაოებზე; წლების განმავლობაში იყო სსრკ ენერგეტიკისა და ელექტროფიკაციის სამინისტროს სამშენებლო-სამონტაჟო ტრესტ "კავკასელექტროქსელმშენის" N1 მექანიზებული კოლონის მთავარი ინჟინერი; მისი ხელმძღვანელობით შესრულებული სამუშაოებიდან აღსანიშნავია "ბზიფი-დაგომისის" 220 კვ. მაღალი ძაბვის ელექტროგადამცემი ხაზის უნიკალური უბანი გაგრის ქედის სამხრეთ კალთაზე, ჟოეკვარას ხეობის გადაკვეთით, "ხაიში-მესტიის" 35 კვ. ელექტროგადამცემი ხაზი უსაყრდენო უბნით; სოხუმისა და დაგომისის 220 კვ. ქვესადგურების დამცავი დამბები; განსაკუთრებით აღსანიშნავია ამ ქვესადგურების შემაერთებელი უნიკალური 500 კვ. მაღალი ძაბვის ელექტროგადამცემი ხაზი "ენგურჰესიდან" ნახარის უღელტეხილამდე; 1947-1948წწ. იყო ელექტროსაქსელო ობიექტების მშენებლობაში ანაკრები რკინაბეტონის კონსტრუქციების დანერგვის ერთ-ერთი ავტორი; მიღებული ჰქონდა მრავალი საპატიო სიგელი და საიუბილეო მედალი, მათ შორის სსრკ სახალხო მეურნეობის მიღწევათა გამოფენის ვერცხლის მედალი.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.583

• შრომის წითელი დროშის ორდენი
• საქართველოს დამსახურებული რაციონალიზატორი
• საქართველოს დამსახურებული ინჟინერი