ნუგზარ ჩანტლაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1962 წელს.

მუშაობდა საპროექტო ინსტიტუტებში "საქგიპროზემი" და "საქსახპროექტი"; იყო საქართველოს მინისტრთა საბჭოს არქიტექტურისა და მშენებლობის განყოფილების რეფერენტი, მთავარი სახელმწიფო მრჩეველი, განყოფილების გამგის მოადგილე; მუშაობდა სს "საქქალაქმშენსახპროექტის" კომერციულ დირექტორად; მონაწილეობდა ზესტაფონის ფეროშენადნობთა და რუსთავის (საქართველო), ბოკაროს (ინდოეთი), კრემიკოვცების (ბულგარეთი) მეტალურგიული ქარხნების, ქუთაისის საავტომობილო ქარხნის, ბათუმის სახლსაშენი კომბინატის გაფართოება-რეკონსტრუქციის სამუშაოების შესრულების პროცესებში, ასევე, ახალი ობიექტების პროექტირებაში; კურირებდა სოციალური და საყოფაცხოვრებო დანიშნულების ობიექტების მშენებლობას, ჩერნობილის ავარიით დაზარალებული ქ. სლავუტიჩისა და საქართველოში მიწისძვრით დაზიანებული რეგიონების ობიექტების აღდგენას, ევროპის პირველობისთვის ფოთის წყალჯომარდობის კომპლექსის ობიექტების მომზადებას; მიღებული ჰქონდა სახელმწიფო ჯილდოები და საუწყებო სიგელები.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.626