რევაზ ჩიკვაიძე

დაბადების ადგილი: ქ. ტყიბული.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1961წელს.

1961-1964წწ. მუშაობდა ჯგუფის ხელმძღვანელად საპროექტო ინსტიტუტებში - "საქჰიპროშახტი" და "საქსახპროექტი"; მონაწილეობდა თბილისის სამგზავრო საბაგირო გზებისა და სამთო სამრეწველო ობიექტების პროექტირებაში; 1964-1980წწ. მონაწილეობდა და ხელმძღვანელობდა მრავალი საპასუხისმგებლო, სამოქალაქო და სატრანსპორტო ნაგებობების გამოცდას - თბილისის სტადიონი "დინამო", საბორნე გადასასვლელები - "ილიჩოსკი-ვარნა", "ბაქო-კრასნოვოდსკი" და სხვა, თბილისის ხიდები (დიდუბის და ბარათაშვილის), რკინიგზის და საავტომობილო ხიდები ამიერკავკასიაში და უკრაინაში; დამუშავებული აქვს მეცნიერულ -კვლევითი თემები რკინაბეტონის თეორიის, სატრანსპორტო და სამოქალაქო ნაგებობების სეისმოდეგობის განხრით ინსტიტუტებთან "НИИЖБ" და "ЦНИИС"-თან ერთად; აგრეთვე ორმხვრივი ხელშეკრულების თანახმად, პრაღის პოლიტექნიკური ინსტიტუტის "ხიდების და რკინაბეტონის კონსტრუქციების" კათედრის სპეციალისტებთან ერთად; 1978 წლიდან ხელმძღვანელობდა საგურამოში და ბორჯომში არსებული კოსმოსურ ნაგებობათა ინსტიტუტის მეცნიერულ-ტექნოლოგიური და გამოსაცდელი ბაზების პროექტირებას და მშენებლობას; მონაწილეობდა ორიგინალური კონსტრუქციების სწრაფადგასაშლელი საგანგებო და ექსტრემალური სიტუაციებისათვის გათვალისწინებულ ხიდების დამუშავებაში, პროექტირებაში და სავალე გამოცდებში; არის 50-ზე მეტი მეცნიერული შრომის ავტორი; 1998წ. 23-28 ივლისს კოსმოსში გაყვანილ იქნა კოსმოსური რადიორეფლექტორის უნიკალური კონსტრუქცია, რომლის დამუშავებაში და დაპროექტებაში მონაწილეობისათვის დაჯილდოებულია "ღირსების ორდენით"; არის საქართველოს ტექნიკური უნივერსიტეტის "სამშენებლო კონსტრუქციების" კათედრის დოცენტი, საქართველოს კოსმოსურ ნაგებობათა ინსტიტუტის წამყვანი სპეციალისტი, საქართველოს სპეციალური საინჟინრო სახელმწიფო ცენტრის სამხედრო-საინჟინრო კონსტრუქციების დეპარტამენტის უფროსის მოადგილე.

წყარო: საქართველოს არქიტექტორთა და მშენებელთა ენციკლოპედია. - თბ., 2017.-გვ.636; წიგნი ღირსებისა: ტ. 6/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2003. - გვ.196

• 2001 - მედალი ''საბრძოლო დამსახურებისათვის''
• 1999 - ღირსების ორდენი
  კოსმოსურ ორბიტაზე პირველი ქართული კონსტრუქციის გატანაში, ორბიტალურ სადგურ ''მირზე'' საქართველო-რუსეთის ერთობლივი პროგრამა ''რეფლექტორით'' ურთულესი ექსპერიმენტის წარმატებით ჩატარებაში, მსოფლიო ბაზარზე კოსმოსური სატელეკომუნიკაციო და სპეციალური თავდაცვითი პროგრამებისათვის მაღალკონკურენტიანი, მეცნიერებატევადი პროდუქციის წარდგენაში შეტანილი სამეცნიერო-ტექნიკური და საწარმოო-ტექნოლოგიური წვლილისათვის