მარინა ხოფერია

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, ინჟინერ-მშენებლის კვალიფიკაციით 1978 წელს.

1978 წლიდან მუშაობდა საპროექტო ინსტიტუტ "საქქალაქმშენსაქპროექტის" სახარჯთაღრიცხვო განყოფილებაში; გაიარა სამსახურებრივი ზრდის ყველა საფეხური რიგითი ინჟინრიდან განყოფილების უფროსამდე; 2003-2005წწ. იყო ურბანიზაციის და მშენებლობის სამინისტროს ეკონომიკის სამმართველოს უფროსი, პარალელურად აგრძელებს მუშაობას ს/ს "საქქალაქმშენპროექტის" სახარჯთაღრიცხვო განყოფილების უფროსად; არის სამშენებლო დარგში ეკონომიკის წამყვანი სპეციალისტი, ეწევა აქტიურ საზოგადოებრივ საქმიანობას, არის ს/ს "საქქალაქმშენსაქპროექტის" სამეთვალყურეო საბჭოს და რიგი კომისიების წევრი; 1985-2006წწ. საქართველოს ექსპერტიზის სამმართველოს ექსპერტი იყო; 2007 წლიდან ექსპერტთა ასოციაცია "მესას" გამგეობის წევრი და ეკონომიკური სექციის ხელმძღვანელია; მშენებლობის სფეროში სახარჯთაღრიცხვო საქმიანობის გაუმჯობესების და დარგის ამ მიმართულებაში არსებული პრობლემების გადაწყვეტის და ახალი ნორმატიული ბაზის შექმნის მიზნით 2003 წელს ჩამოაყალიბა "მშენებლობის შემფასებელთა კავშირი", რომლის პრეზიდენტადაც იქნა არჩეული; 2005 წლიდან კავშირის მიერ განახლდა და გამოიცემა ყოველკვარტალური კატალოგი "სამშენებლო რესურსების ფასთა კრებული" და მეთოდოლოგიური ლიტერატურა; მის მიერ დამუშავებული ობიექტების ნუსხა მრავალფეროვანია: ტაძრები, პრეზიდენტის რეზიდენციისა და პარლამენტის ადმინისტრაციული შენობები, მუზეუმები და მრავალი ინფრასტრუქტურული ობიექტები; 2012 წლიდან არის საქართველოს ეროვნული მუზეუმის ობიექტების მენეჯერი; 2015 წლიდან საქართველოს ტექნიკური უნივერსიტეტის საპროექტო ჯგუფის მენეჯერი; წლების განმავლობაში მის მიერ შედგენილია საქართველოს რესპუბლიკის და აგრეთვე საკავშირო მნიშვნელობის სამოქალაქო და ადმინისტრაციული ობიექტების საპროექტო დოკუმენტაციის ეკონომიკური გაანგარიშებები, ბიზნეს-გეგმები და სახარჯთაღრიცხვო დოკუმენტაცია; რიგ ობიექტებზე უცხოური ინვესტიციების მოთხოვნის გათვალისწინებით აქვს მომზადებული საინვესტიციო პროექტები, მათ შორის, წმინდა სამების საკათედრო ტაძრის კომპლექსის სახარჯთაღრიცხვო დოკუმენტაცია, რომლისთვისაც დაჯილდოვდა სრულიად საქართველოს კათოლიკოს პატრიარქის ილია-II ხელმოწერილი საპატრიარქოს სიგელით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.726